Mál Thomasar Møller þingfest á mánudag

Mál Thomasar Møller Olsen, sem grunaður er um að hafa ráðið Birnu Brjánsdóttur bana, verður þingfest í Héraðsdómi Reykjavíkur í hádeginu á mánudag. Hann er ákærður fyrir manndráp og stórfellt fíkniefnalagabrot.

Thomasi var birt ákæran í morgun. Gera má ráð fyrir að hann taki formlega afstöðu til ákærunnar við þingfestinguna á mánudag, en hann hefur staðfastlega haldið fram sakleysi sínu við yfirheyrslur.

Thomas hefur sætt gæsluvarðhaldi frá 18. janúar síðastliðnum, eftir að hafa verið handtekinn í aðgerðum sérsveitarinnar um borð í togaranum Polar Nanoq. Hann er vistaður í fangelsinu á Hólmsheiði.

Gert er ráð fyrir aðalmeðferð málsins fari fram fyrir sumarfrí dómstólanna, sem hefst í júlí.