Alvarlega slasaður eftir hnífstunguárás í Kópavogi

Karlmaður á fertugsaldri var stunginn með hníf á veitingastað á Smáratorgi í Kópavogi á áttunda tímanum í kvöld. Maðurinn er talinn alvarlega slasaður og er nú á gjörgæslu.

Tveir menn voru handteknir í tengslum við árásina en þeir eru báðir á tvítugsaldri. Að sögn lögreglu komust þeir báðir af vettvangi en voru handteknir skömmu síðar. Þeir hafa verið vistaðir í fangageymslur og verða yfirheyrðir á morgun.

Rannsókn málsins er nú í höndum miðlægrar rannsóknardeildar lögreglunnar á höfuðborgarsvæðinu, að sögn varðstjóra hjá lögreglunni í Kópavogi.