Bílastæðin full við Leifsstöð: Farþegum ráðlagt að taka rútu eða láta skutla sér

Svo virðist sem að ansi margir Íslendingar hafi ákveðið að skella sér til útlanda í páskafríinu sem hófst í dag. Langtímastæði við Keflavíkurflugvöll eru oðinn full og ekki er hægt að leggja fleiri bílum í stæðin.

Þetta kemur fram í tilkynningu frá ISAVIA en þar segir að farþegum sé ráðlagt að taka rútu eða Strætó eða láta aka sér á flugvöllinn.

Starfsmenn Isavia hafa unnið að því undanfarna daga að flytja bíla af bílastæðunum á önnur svæði og hefur meðal annars verið tekinn undir það hluti af rútustæðum við flugvöllinn.

600 bílar hafa verið fluttir og er hreinlega eakki meira pláss á þeim svæðum sem gert var ráð fyrir að notast við ef þessi staða kæmi upp.

Er þetta mun meiri nýting en Isavia gerði ráð fyrir yfir páskana en núna eru um þrjú þúsund bílar í langtímastæðunum. Á síðasta ári voru um tvö þúsund bílar í langtímastæðunum yfir páskana.

Isavia segir að augljóslega þurfi að stækka bílastæðin enn frekar svo hægt sé að ráða við mesta álagstíma ársins, sem jafnan eru páskarnir.

Vill Isavia biðjast afsökunar á þeim óþægindum sem þetta kann að valda flugfarþegum.