Fékk 15 ára dóm fyrir að sveigja viljandi í veg fyrir mótorhjól

Fyrir tveimur árum síðan flaug um netheima myndskeið frá Texas þar sem sést til ökumanns á bíl sveigja viljandi í veg fyrir mótorhjól sem huggðist taka framúr honum. Það varð til þess að bæði ökumaður hjólsins og farþegi hans enduðu flatir utan vegar og voru fluttir slasaðir á spítala.

Ökumaður bílsins vissi hinsvegar ekki að aðfarir hans náðust á mynd því ökumaður annars mótorhjóls rétt fyrir aftan tók upp aðfarir hans og sést það hér að ofan. Ökumaður bílsins, William Crum, náðist þó svo hann hafi ekið frá slysstaðnum og nú hefur verið dæmt í máli hans. Hann hlaut 15 ára fangelsisdóm og má telja víst að margur mótorhjólamaðurinn sé ekki ýkja svekktur yfir því, að minnsta kosti ekki sá sem hann svínaði fyrir viljandi.

Ökumaður bílsins var þarna ekki að fá sinn fyrsta dóm, en árið 2007 fékk hann dóm fyrir kærulausan akstur og hótanir, en hann gerði tilraun til þess að aka niður tvö ungmenni á golfbíl. Það tókst þó ekki en þá dró hann upp skotvopn og hótaði ungmennunum. Hann á aðra tvo fyrri dóma að baki svo hæglega má segja að hér sé síbrotamaður á ferð.