Slæmur skellur í fyrsta leik hjá stelpunum á Smáþjóðaleikunum

Íslenska kvennalandsliðið í körfubolta byrjar ekki vel á Smáþjóðaleikunum í San Marinó en liðið tapaði með 19 stigum á móti Möltu í dag, 68-49.

Tapið þýðir að íslenska liðið á ekki lengur raunhæfa möguleika á því að vinna gullverðlaun á mótinu. Þetta er stærsta tap íslenska kvennalandsliðsins á Smáþjóðaleikum frá 1991 og stærsta tap Íslands fyrir Möltu frá upphafi.

Íslenska liðið hitti aðeins úr 27 prósent skota sinna í þessum leik og Malta skoraði 25 stig eftir tapaða bolta hjá íslenska liðinu. Það sást því langar leiðir að þetta var fyrsti landsleikur stelpnanna í meira en sex mánuði.

Hildur Björg Kjartansdóttir var atkvæðamest í íslenska liðinu með 13 stig og 11 fráköst. Helena Sverrisdóttir spilaði ekki með í dag en hún var hvíld vegna meiðsla á kálfa.

Liðin hittu illa í byrjun en í stöðunni 5-5 skildu leiðir. Malta skoraði fjórtán stig í röð og leiddi síðan 19-6 eftir fyrsta leikhlutann. Íslensku stelpurnar hittu aðeins úr 15 prósent skota sinna í fyrsta leikhluta liðsins á árinu 2017 (2 af 13).

Maltneska liðið var komið 23 stigum yfir, 30-7, þegar annar leikhlutinn var hálfnaður en íslenska liðinu tókst að minnka muninn í sautján stig fyrir hálfleik, 37-20.

Íslenska liðið náði hinsvegar ekki að laga stöðuna í þriðja leikhlutanum sem liðið tapaði 23-12 og var þar með komið 28 stigum undir, 60-32, fyrir lokaleikhlutann.

Íslensku stelpurnar löguðu stöðuna í lokin með því að skora 15 af síðustu 19 stigum leiksins og munurinn var því „bara“ 19 stig í lokin.

Malta hefur unnið tvo stórsigra á leikunum því liðið vann 31 stigs sigur á Kýpur í gær. Lúxemborg er fjórða liðið á leikunum en Lúxemborg vann 59-47 sigur á Kýpur fyrr í dag.

Atkvæðamestar í íslenska liðinu í leiknum:

Hildur Björg Kjartansdóttir 13 stig, 11 fráköst

Sigrún Sjöfn Ámundadóttir 7 stig

Emelía Ósk Gunnarsdóttir 7 stig

Sandra Lind Þrastardóttir 6 stig

Ragna Margrét Brynjarsdóttir 5 stig

Berglind Gunnarsdóttir 4 stig

Ingunn Embla Kristínardóttir 2 stig

Hallveig Jónsdóttir 2 stig

Thelma Dís Ágústsdóttir 2 stig

Sara Rún Hinriksdóttir 1 stig

Birna Valgerður Benónýsdóttir skoraði ekki í sínum fyrsta landsleik.