Búist við hlýju veðri í vikunni og síðdegisskúrum

Búist er við ágætis veðri í dag og fyrri hluta vikunnar. Úrkoma verður lítil og talar vakthafandi veðurfræðingur hjá Veðurstofu Íslands,  Arnór Tumi Jóhannsson, um að búast megi við mildu skúraveðri af og til eftir hádegi.

Skúrir verða helst á suðvestanverðu landinu og telur Arnór að líklega muni einnig verða skúrir norðan heiða. Suðausturland sleppur vel vegna skjóls frá jöklinum en þó gæti orðið hvasst þar.

Mánudagur, þriðjudagur og miðvikudagur eru ansi svipaðir segir Arnór. Það verði eitthvað um hægan vind úr vestri og skýjað verður suðvestan til.

Veðurspána í heild má nálgast hér að neðan og inn á vef Veðurstofu Íslands. 

Veðurhorfur á landinu

Norðaustlæg eða breytileg átt, yfirleitt 3-8 m/s. Skúrir austan- og sunnanlands, annars víða bjartviðri. Vestlæg átt á morgun, yfirleitt 3-8. Skýjað með köflum og skúrir, en bjartara veður austantil á landinu. Hiti 7 til 16 stig, hlýjast vestanlands í dag, en austanlands á morgun.

Spá gerð: 25.06.2017 09:01. Gildir til: 27.06.2017 00:00.

Veðurhorfur á landinu næstu daga

Á þriðjudag, miðvikudag og fimmtudag: Hæg vestlæg eða breytileg átt. Bjartviðri á köflum, en víða síðdegisskúrir, einkum inn til landsins. Hiti víða 8 til 15 stig.

Á föstudag: Suðlæg átt, skýjað með köflum, en allvíða síðdegiskúrir. Hiti breytist lítið.

Á laugardag: Útlit fyrir austlæga átt með vætu á köflum syðst á landinu, en annars úrkomulítið. Áfram milt í veðri.

Spá gerð: 25.06.2017 08:05. Gildir til: 02.07.2017 12:00.

Hugleiðingar veðurfræðings

Loftþrýstingur hefur farið hækkandi á landinu og verður veður með skaplegra móti á landinu í dag, þótt skúrir kunni að falla sunnan- og austanlands. Viðbúið er að sú gula muni sjást í ríku mæli á vesturhelmingi landsins og eitthvað mun sjást til hennar á suðausturhorninu. Vikan framundan verður sennilega pollróleg hvað varðar veður. Það munu ríkja hægir vestanvindar og er þá sem oftast bjartasta veðrið að finna á austurhluta landsins.