Ragnar Kjartansson er lostafullur súludansari í nýju myndbandi The National

„Við elskum Ragnar Kjartansson,“ segja félagarnir í bandarísku hljómsveitinni The National í stöðuuppfærslu á samfélagsmiðlinum Instragram þegar þeir kynna nýjasta myndband sveitarinnar við lagið I‘ll Still Destroy You sem Ragnar leikur í.

„Hann vildi bara strippa sem sjóari á bar sem heitir Dóp og spilling,“ segir Allan Sigurðsson í samtali við Vísi en hann, ásamt Ragnari, leikstýrði myndbandinu sem gerist á bar í Kaupmannahöfn. Myndbandið hefst á lágstemmdum nótum. Fljótlega færist þó hiti í leikinn og allsherjar teiti brýst út á barnum og nær hæstu hæðum á lokamínútum verksins. Ragnar bregður sér í hlutverk lostafulls súludansara í glimmernærbuxum einum klæða.

Tónlistarmyndbandið var tekið upp á meðan á tónlistarhátíð Haven stóð yfir en Ragnar Kjartansson var með listgjörning á hátíðinni sem hverfist einmitt um barinn Dóp og spillingu þar sem hann dansaði fáklæddur sem sjóari. Ragnar, ásamt fleirum, smíðuðu bar sérstaklega fyrir gjörninginn en hann var rifinn niður daginn eftir að myndbandið var tekið upp.

„Ég er bara í skýjunum með þetta,“ segir Allan sem er hæstánægður með afraksturinn. Hann segir félagana í The National einnig vera mjög ánægða með myndbandið og þá segir hann að það hafi verið gott að vinna með hljómsveitinni.

Tvíburabræðurnir Aaron og Bryce Dessner, sem tilheyra hljómsveitinni, stóðu að tónlistarhátíðinni sem þeir lýsa sem hátíð skynjunarinnar en auk þess að vera tónlistarhátíð er boðið upp á list, mat og drykk.

Þetta er ekki í fyrsta sinn sem The National vinnur með Ragnari en þeir féllust á það að taka þátt í tónlistargjörningi í Museum of Modern Art þar sem þeir fluttu lagið Sorrow af plötunni High Violet hvorki meira né minna en í sex klukkustundir samfleytt.