Rjúpnaveiðifólk ætti að fylgjast sérstaklega vel með veðurspám á morgun

Spáð er suðaustanstormi á morgun. Hvassast verður við suðvesturströndina, á norðanverðu Snæfellsnesi og á hálendinu seint á morgun.

Búast má við mjög hvössum vindstrengjum við fjöll víða um land og snjókomu á fjallvegum. Líkur eru því á einhverjum samgöngutruflunum.

Þetta kemur fram í athugasemd veðurfræðings á vef Veðurstofu Íslands.

Þar segir að rjúpnaveiðifólk ætti að fylgjast sérstaklega vel með veðurspám og að veðrið muni sella hratt á, fyrst suðvestantil, upp úr hádegi á morgun með skafrenningi og síðar snjókomu.

Fólki er bent á að ganga frá lausum munum þar sem fyrsta djúpa lægð vetrarins lætur til sín taka á morgun.

Veðurhorfur á landinu

Norðlæg átt, 5-13 m/s, hvassast við A-ströndina. Dálítil N- og A-lands, en annars skýjað með köflum eða bjartviðri. Lægir og léttir víða til í kvöld og nótt, en austanlands í fyrramálið. Hiti um og undir frostmarki, en talsvert frost til landsins í nótt. Vaxandi suðaustanátt og þykknar upp á morgun, fyrst suðvestantil, 20-28 m/s og talsverð slydda eða rigning S- og V-til seinni partinn, hvassast við ströndina, en annars hægari og úrkomulítið. Suðaustan 18-25 norðan og austanlands seint annað kvöld og sums staðar snjókoma eða slydda, en fer að draga úr vindi suðvestanlands. Heldur hlýnandi veður.

Veðurhorfur á landinu næstu daga

Á mánudag:

Suðaustan 15-23 m/s norðaustantil fram undir hádegi, en talsverð rigning austanlands. Annars mun hægari vindur og skúrir eða él, en styttir upp og léttir nokkuð til fyrir norðan þegar líður á daginn. Hiti 0 til 5 stig að deginum, frystir víða um kvöldið.

Á þriðjudag:

Fremur hæg breytileg átt. Dálítil rigning eða slydda suðaustantil, en annars él á stöku stað. Víða frostlaust við sjávarsíðuna, en annars vægt frost.

Á miðvikudag:

Snýst í norðanátt með éljum, en birtir til fyrir sunnan þegar líður á daginn. Svalt í veðri.

Á fimmtudag:

Norðanátt og él norðaustantil fram eftir degi, en annars hæglætisveður og víða bjart. Frost 0 til 6 stig, en sums staðar frostlaust við ströndina.

Á föstudag:

Útlit fyrir norðaustanátt með snjókomu eða éljum. Áfram kalt í veðri.