Bílaleigur hafa keypt færri bíla í ár en í fyrra

Bílaleigur hafa hresst mjög upp á bílsölumarkaðinn hérlendis á síðastliðnum árum og verið um helmingur seldra bíla á síðustu árum. Nú eru teikn á lofti um að um sé farið að hægjast í þeim efnum. Bílaleigur landsins fengu 81 nýjan bíl afhentan í október, 36% færri en í sama mánuði í fyrra þegar nýskráðir voru 127 bílar.

Samdráttur í nýskráningum bílaleigubíla það sem af er árinu nemur um tveimur prósentum miðað við sama tíma í fyrra. Alls keyptu leigurnar 8.164 nýja bíla fyrstu tíu mánuði þessa árs samanborðið við 8.345 bíla janúar-október 2016.

Það sem af er ári er BL langsöluhæsta bílaumboð landsins og þar á bæ stefnir í 6.500 bíla sölu áður en árið er liðið. Í nýliðnum októbermánuði voru 318 bílar af merkjum BL nýskráðir samkvæmt upplýsingum frá Samgöngustofu. Flestir voru af gerðinni Nissan, eða alls 95 og er Nissan jafnframt það merki BL sem hefur vaxið hlutfallslega mest, eða um 34% á árinu ef undanskilin eru nýjustu merki fyrirtækisins, Jaguar og Mini, sem voru ekki í boði á síðasta ári. Alls voru 1.248 fólks- og sendibílar nýskráðir á markaðnum í október sem er 22,6% aukning frá október 2016.

Renault var næst mest selda merki BL í október með 66 nýskráningar og síðan Hyundai með 64 skráða bíla. Hyundai er jafnframt mest selda merki BL á árinu með rétt tæplega sautján hundruð nýskráningar og 28% aukningu miðað við sama tíma fyrir ári. Markaðshlutdeild BL í október var 25,5% og er nú 28,1% það sem af er árinu.

Heildarmarkaður fólks- og sendibíla hefur vaxið um 15% á árinu miðað við sama tíma í fyrra og höfðu 21.072 fólks- og sendibílar verið nýskráðir um síðustu mánaðamót. Þar af nam fjöldi bíla af merkjum BL 5.914. Það eru rúmlega 25% fleiri bílar en á sama tímabili 2016 og munar 1.164 bílum.

Næstsöluhæsta umboð landsins er Toyota með 3.796 nýskráða fólksbíla og Hekla í því þriðja með 3.328 bíla. Fjórða söluhæsta umboðið er Brimborg með 2.983 skráningar og Askja í því fimmta með 2.650 bíla. Önnur bílaumboð eru þar talsvert fyrir neðan og Suzuki þar söluhæst með 681 bíl nýskráðan.