Mourinho á að mæta fyrir rétt í Madrid í dag

Í dag verður tekin fyrir á Spáni ákæra gegn Jose Mourinho, stjóra Man. Utd, vegna meintra skattsvika.

Mourinho er sagður skulda skattinum á Spáni litlar 409 milljónir króna. Hann hefur neitað þessum ásökunum.

Það er ekki vitað hvort Mourinho ætli að mæta sjálfur til réttarhaldanna en margt bendir þó til þess. Hann er vanur að vera með blaðamannafund á föstudögum en var með þann fund í gær.

Svo segja sögur að leikmönnum Man. Utd hafi verið tilkynnt um breytingar á æfingaplani.

Málið gegn Mourinho kom upp í sumar og þá varð ljóst að hann þyrfti að mæta fyrir spænska dómstóla tveimur dögum fyrir risaleikinn gegn Chelsea.