Vilja þyngri dóm yfir góðkunningja sérsveitarinnar

Ríkissaksóknari hefur áfrýjað tólf mánaða dómi yfir Sigurði Almari Sigurðssyni frá því í lok september og vill að dómurinn verði þyngdur. Sigurður var dæmdur fyrir þrjár líkamsárásir, gegn unnustu sinni annars vegar og starfsmönnum Reykjavíkurborgar við þjónustukjarna í Rangárseli í Reykjavík. Saksóknari fór fram á tveggja ára fangelsi í héraði.

Hefur Sigurður verið úrskurðaður í gæsluvarðhald til 21. desember á meðan mál hans bíður meðferðar fyrir Hæstarétti.

Fjallað var um dóminn á Vísi í september. Unnustan, sem Sigurður var dæmdur fyrir að ráðast á, breytti framburði sínum fyrir dómi og sagði hund hafa ráðist á sig. Þá hefur starfsfólk þjónustukjarnans sagst hrætt við hann og óskaði einn starfsmaður nafnleyndar fyrir dómi vegna ótta við Sigurð.

Sigurður hefur á síðustu tíu árum verið dæmdur til um sjö ára óskilorðsbundinnar fangelsisvistar er segir í greinargerð lögreglu sem fylgdi kröfunni um gæsluvarðhald á grundvelli almannahagsmuna.

Metinn sakhæfur

Sigurður gekkst undir geðheilbrigðisrannsókn undir rannsókn framangreindra mála. Niðurstaða fjölskipaðs dóms þar sem sat geðlæknir sem sérfróður meðdómari, var sú að enginn vafi var talinn leika á því að dómfelldi hefði verið sakhæfur þegar hann framdi brot þau sem hann var ákærður fyrir.

Lögregla telur að gangi Sigurður laus muni hann ekki eingöngu brjóta af sér fljótlega á nýjan leik heldur muni hann valda sjálfum sér og/eða öðrum verulegu tjóni. Hann sé verulega hættulegur einstaklingur sem lýsi sér í því að iðulega sé notast við sérsveit er afskipti séu höfð af honum enda hafi hann margítrekað gerst sekur um ofbeldisbrot. Þá hafi hann tilhneigingu til að bregðast illa við afskiptum lögreglu og annarra yfirvalda eins og segir í greinargerðinni.

Sigurður hefur verið í gæsluvarðhaldi frá 17. júní síðastliðnum. Hann er fæddur árið 1984 og á að baki sakaferil frá árinu 2002. Hann hefur þrívegis hlotið refsidóma fyrir brot gegn valdstjórninni og þá eru líkamsárásar- og þjófnaðarbrot hans margítrekuð.