Hundruð þúsunda Spánverja vilja banna stofnun sem upphefur einræðisherrann Franco

Meira en 200 þúsund Spánverjar hafa ritað nafn sitt á undirskriftarlista þar sem þess er krafist að svokölluð Francisco Franco-stofnun verði bönnuð.

Undirskriftalistinn var lagður inn hjá spænska þinginu í dag en þeir sem rita nafn sitt á hann vilja að þingið samþykki lög þess efnis að bannað verði að upphefja Franco og valdatíð hans en hann komst til valda eftir blóðuga borgarstyrjöld á 4. áratug síðustu aldar og var einræðisherra á Spáni frá árinu 1939 til 1975. Það sé til dæmis óhugsandi að það væri Hitler-stofnun í Þýskalandi eða Mussolini-stofnun á Ítalíu.

„Það er ótrúlegt að lýðræðisríki skuli leyfa stofnun á borð við þessa sem ætlað er að vinna í þágu almennings. [...] Ef þú styrkir þessa stofnun þá færðu skattaafslátt svo stofnunin er óbeint niðurgreidd af hálfu hins opinbera. Fólk má hugsa og tjá sig eins og það vill en ríkið ætti ekki að hjálpa stofnun fjárhagslega sem lofsyngur einræðisherrann opinberlega,“ segir Emilio Silva, stofnandi samtaka sem sækjast eftir réttlæti fyrir fórnarlömb borgarstyrjaldarinnar sem og fórnarlamba einræðisstjórnar Franco.

Heiðursforseti Franco-stofnunarinnar er Carmen Franco, dóttir Franco sjálfs, en hún er 91 árs gömul. Stofnunin hefur það yfirlýsta hlutverk að verja gjörðir og arfleið Franco.

Þannig hætti til að mynda borgarstjórn Madrídar við það í október síðastliðnum að breyta götuheitum sem voru til heiðurs hetjum einræðisstjórnar Franco eftir að stofnunin kvartaði.  

500 þúsund þurfa að skrifa undir áskorunina til spænska þingsins til þess að neðri deild þess íhugi að semja frumvarp vegna málsins.