Áfram í farbanni vegna tungubits

Hæstiréttur hefur staðfest farbannsúrskurð Héraðsdóms Reykjavíkur gagnvart konu sem grunuð er um að hafa bitið tunguna af eiginmanni sínum. Konan segir að hún hafi óvart bitið í tungu mannsins.

Líkamsárásin átti sér stað í síðata mánuði í Reykjavík. Lögregla var kölluð á vettvang og voru mikil læti á staðnum þegar hana bar að garði.

Í greinargerð lögreglu segir að konan hafi reiðst þegar eiginmaður hennar hafi verið að gera sér dælt við aðra konu á staðnum. Hafi þau í kjölfarið farið að rífast. Við yfirheyrslu sagði konan að eiginmaðurinn hefði verið mikið í andlitinu á sér.

Kvaðst hún hafa bitið hann óvart en „kvaðst svo ekki hafa skilið þann styrk sem hún hafi í tönnunum þegar hún hafi birtið í tunguna á honum,“ að því er segir í skýrslunni.

Alls þurfti að sauma 30 spor til þess að festa tunguhlutann sem bitinn var af aftur á. Sú aðgerð virðist hins vegar ekki hafa skilað tilætluðum árangri og er tunguhlutinn ónýtur.

Konan er áströlsk en maðurinn franskur ríkisborgari.