Audi Q8 án feluklæða

Audi sýndi jeppann Q8 concept fyrr á þessu ári á Detroit bílasýningunni og vinnur nú að því að gera þetta flaggskip í jeppaflokki tilbúið til framleiðslu. Nýlega náðust myndir á Spáni af bílnum án feluklæða og á þeim sést að bíllinn ber nokkurn keim af Lamborghini Urus ofurjeppanum, enda tilheyra bæði Audi og Lamborghini stóru Volkswagen bílafjölskyldunni og sami undirvagn er undir bílunum.

Þessi tilvonandi Audi Q8 jeppi hallar mjög að aftan, líkt og Lamborghini Urus jeppinn og teljast þeir báðir vera með “coupe”-lagi. Þar heldur Audi sig á kunnuglegum slóðum líkt og Audi A5 er “coupe”-útgáfa A4 bílsins og A7 er einnig “coupe”-útgáfa A6 bílsins. Því má segja að Audi Q8 sé “coupe”-útgáfa Q7 jeppans.

Vitað er að mælaborðið í Q8 verður mjög likt gríðarflottu mælaborðinu í hinum nýja Audi A8 bíl og með tveimur stafrænum snertiskjám. Von er á Audi Q8 bílnum á markað snemma á næsta ári og verður hann sýndur í endanlegri mynd á Detroit bílasýningunni snemma á næsta ári. Audi Q8 verður framleiddur seinna meir sem tengiltvinnbíll og líklega sem hreinræktaður rafmagnsbíll líka.