Hlýnar og rignir

Ef marka má kort Veðurstofunnar mega Íslendingar gera ráð fyrir nokkrum rauðum hitatölum næstu daga.

Framanaf degi verður víða hægur vindur, léttskýjað og talsvert frost en með vaxandi suðaustanátt á Suður- og Vesturlandi síðar í dag mun þykkna upp og draga úr frosti.

Þá verður suðaustan 13 til 20 m/s kringum miðnætti með snjókomu í fyrstu en síðan rigningu eða slyddu á láglendi. Hitinn verður á bilinu 0 til 5 stig.

Á Norður- og Austurlandi verður þó hægari vindur og úrkomulítið. Þar mun frostið jafnframt minnka. Dregur aftur úr vindi og ætla má að það verði suðaustan 5 til 13 metrar seinni partinn á morgun. Því muni fylgja skúrir eða él - en rigning á Suðausturlandi.

Veðurhorfur á landinu næstu daga

Á þriðjudag:

Suðaustan 10-18 m/s og rigning eða slydda, en snjókoma til fjalla. Hiti 0 til 5 stig. Hægari vindur á Norður- og Austurlandi, úrkomulítið og minnkandi frost. Suðaustan 5-13 og skúrir eða él undir kvöld, en rigning SA-lands. Hiti kringum frostmark.

Á miðvikudag:

Snýst í norðaustan 8-13 m/s. Slydda eða rigning með köflum og snjókoma til landsins, en styttir upp á Suður- og Vesturlandi. Víða frostlaust við ströndina, annars vægt frost.

Á fimmtudag:

Norðan 8-13 og dálítil él, en léttskýjað sunnan heiða. Frost 0 til 5 stig.

Á föstudag:

Fremur hæg norðlæg eða breytileg átt og bjartviðri, en él við norðausturströndina. Frost 2 til 12 stig.



Á laugardag:

Suðaustanátt með rigningu, slyddu eða snjókomu, en úrkomulítið norðaustantil á landinu. Hiti kringum frostmark.