Innlent

Maðurinn handtekinn sem flúði af vettvangi eftir andlát sambýliskonu

Kolbeinn Tumi Daðason skrifar
Hann flúði vettvang íbúðarinnar þar sem konan fannst en upplýsti samkvæmt heimildum fréttastofu ættingja um það sem gerst hafði. Var í framhaldinu haft samband við lögreglu.
Hann flúði vettvang íbúðarinnar þar sem konan fannst en upplýsti samkvæmt heimildum fréttastofu ættingja um það sem gerst hafði. Var í framhaldinu haft samband við lögreglu. Vísir/GVA
Lögreglan á höfuðborgarsvæðinu handtók í gærkvöldi tæplega fertugan karlmann í tengslum við andlát barnsmóður og sambýliskonu hans. Verður maðurinn yfirheyrður í dag.

Hann flúði vettvang íbúðarinnar þar sem konan fannst en upplýsti samkvæmt heimildum fréttastofu ættingja um það sem gerst hafði. Var í framhaldinu haft samband við lögreglu.

Lögregla leitaði mannsins í gær og var hann handtekinn í gærkvöldi. Það staðfestir Margeir Sveinsson, aðstoðaryfirlögregluþjónn hjá lögreglunni á höfuðborgarsvæðinu, í samtali við fréttastofu. Aðspurður hvort maðurinn liggi undir grun segir Margeir það yfirleitt þannig að þegar menn séu handteknir þá séu þeir sakborningar. 

Allir þættir málsins eru til skoðunar, meðal annars sá hvort maðurinn hafi ekki reynt að koma manneskju í nauð til aðstoðar. Ekki sé talið að andlátið hafi borið að með saknæmum hætti. Samkvæmt íslenskum lögum hvílir sú skylda á mönnum að koma náunganum til hjálpar sé hann í nauðum

Maðurinn á langa brotasögu að baki og hefur hlotið þunga dóma fyrir ofbeldi. Þá hefur hann hlotið dóm fyrir að hvetja unglingsstúlku til fíkniefnaneyslu. Fyrri unnusta mannsins lést úr ofneyslu fíkniefna fyrir nokkrum árum en hún var þá rúmlega tvítug.

Móðir mannsins segir í samtali við Vísi það vissulega rétt að sonur hennar hafi farið á vettvangi eftir andlát konunnar. Það megi rekja til hræðslu hans þar sem hann væri á skilorði. Áður en til þess kom hafi hún hins vegar horft á son sinn gera allt sem hann gat til að blása lífi í konuna á meðan hún ræddi við starfsmann Neyðarlínunnar og kom leiðbeiningum áfram á son sinn.

Uppfært klukkan 12:51 með frásögn móðurinnar.

Lögreglumál

Tengdar fréttir

Flúði vettvang við andlát

Kona á fertugsaldri fannst látin í íbúð sinni í Álftamýri í gærkvöldi en lögreglan á höfuðborgarsvæðinu hefur í dag leitað sambýlismanns hennar sem flúði af vettvangi.

Mest lesið


Fleiri fréttir

Sjá meira


×

Mest lesið