Meirihluti norska þingsins styður vantraust á dómsmálaráðherrann

Allar líkur eru á því að norska þingið lýsi yfir vantrausti á dómsmálaráðherrann Sylvi Listhaug á morgun en tillaga þess efnis er á dagskrá þingsins. Meirihluti þingmanna á norska þinginu styður vantrauststillöguna eftir að leiðtogi Kristilega demókrataflokksins, Knu Arild Hareide, lýsti því yfir að flokkurinn treysti ekki Listhaug. Greint er frá málinu á vef Guardian.

 

Minnihlutastjórn Framfaraflokksins Listhaug og Hægriflokks Ernu Solberg, forsætisráðherra, reiðir sig á stuðning Kristilega demókrataflokksins. Þann stuðning hefur Listhaug hins vegar ekki lengur í embætti dómsmálaráðherra en ástæðan er færsla á Facebook-síðu hennar fyrr í mánuðinum þar sem hún sakaði Verkamannaflokkinn um að setja réttindi hryðjuverkamanna ofar þjóðaröryggi landsins.

Liðsmenn Verkamannaflokksins voru fórnarlömb versta fjöldamorðs í sögu Noregs árið 2011 en tilefni færslu Listhaug á Facebook var að þingmenn flokksins greiddu atkvæði gegn frumvarpi hennar sem hefði veitt stjórnvöldum rétt á að svipta grunaða hryðjuverkamenn norskum ríkisborgararétti án þess að hægt væri að skjóta ákvörðuninni til dómstóla. Vildu þingmenn Verkamannaflokksins að hægt yrði að áfrýja til dómstóla.

„Verkamannaflokkurinn telur að réttindi hryðjuverkamanna mikilvægari en þjóðaröryggi landsins. Líkið og deilið,“ skrifaði Listhaug á Facebook og birti með mynd af grímuklæddu fólki í herklæðum, með svarta trefla og skotfæri.

Ráðherrann fékk strax mikla gagnrýni á sig vegna þessara skrifa en það tók hana þó sex daga að eyða færslunni. Þá fékk hún enn meiri gagnrýni á sig þar sem hún baðst fyrst ekki afsökunar á því hversu særandi færslan var heldur því að hún hefði gert mistök á samfélagsmiðlum.

Á endanum baðst Listhaug innilegrar afsökunar og sagði að það væri auðvitað ekki tilfellið að Verkamannaflokkurinn væri einhvers konar ógn við þjóðaröryggi. Þá hefur Erna Solberg einnig beðist afsökunar fyrir hönd ríkisstjórnarinnar.

Eftir fjögurra tíma fund hjá landsnefnd Kristilega demókrataflokksins varð hins vegar ljóst að afsökunarbeiðnirnar duga ekki til þar sem að flokkurinn styður vantraust á dómsmálaráðherra, auk Miðflokksins og fimm vinstriflokka.