Hallarbylting slökkviliðsmanna í Borgarnesi

Mikil ólga ríkir innan Slökkviliðs Borgarbyggðar og hafa slökkviliðsmenn kvartað við stjórnendur sveitarfélagsins vegna samstarfsörðugleika á milli starfsmanna og stjórnenda slökkviliðsins. Senda á núverandi slökkviliðsstjóra, Bjarna Kristinn Þorsteinsson, í veikindaleyfi. Gengið var fram hjá aðstoðarslökkviliðsstjóra og auglýst eftir nýjum stjóra í afleysingar til sex mánaða.

Búið var að ráða Huldu Geirsdóttur sem nýjan slökkviliðsstjóra, eftir að staðan var auglýst í janúar. Mannvirkjastofnun gerði athugasemd við ráðninguna þar sem Hulda hafði hvorki næga menntun né reynslu. Ekkert varð því af ráðningu hennar.



Umdæmi Slökkviliðs Borgarbyggðar er Borgarfjörður og Eyja- og Miklaholtshreppur og eiga 53 slökkviliðsmenn að vera skráðir til starfa þar.

Samkvæmt heimildum Vísis hefur til lengri tíma ríkt óánægja innan Slökkviliðs Borgarbyggðar með störf stjórnenda. Slökkviliðsmenn munu hafa rætt málið sín á milli og við stjórnendur Borgarbyggðar og verður Bjarni Þorsteinsson, slökkviliðsstjóri sendur í veikindaleyfi.

Krafa slökkviliðsmanna er sú að ráðið verði í stöður slökkviliðsstjóra og aðstoðarslökkviliðsstjóra. Annars séu slökkviliðsmenn líklegir til að segja upp störfum.

Margir ekki fullgildir slökkviliðsmenn

Meðal þess sem slökkviliðsmenn hafa gagnrýnt stjórnendur fyrir eru samskiptaörðugleikar, að ekki ríki traust á milli liðsmanna og stjórnenda og upplýsingagjöf þar á milli hafi verið of lítil til langs tíma. Sömuleiðis hefur slökkviliðsmönnum þótt æfingar of fáar og illa skipulagðar. Því standist fáir skilyrði til að vera fullgildir slökkviliðsmenn og reykkafarar.

Þar að auki hefur Vísir heimildir fyrir því að slökkviliðsmenn mæti ekki á æfingar sem skipulagðar hafa verið af aðstoðarslökkvistjóra.

Krafa um tuttugu klukkustundir í æfingar á ári og 25 klukkustundir til viðbótar fyrir reykkafara hefur ekki verið uppfyllt að sögn slökkviliðsmanna sem Vísir hefur rætt við. Þá hafi æfingar ekki verið haldnar fyrir liðsheildina heldur hafi þeim verið skipt á milli slökkviliðsmanna í Borgarnesi annars vegar og á Hvanneyri og í Reykholti hins vegar.

Þar að auki eru liðsmenn ósáttir við að fá ekki útköll í minni verkefni. Þau hafi stjórnendur séð sjálfir um.

Hefur aldrei beðið um veikindaleyfi

Slökkviliðsstjórinn Bjarni Þorsteinsson, sem sinnt hefur starfinu frá 1999, segist hafa veikst á síðasta ári og verið frá vinnu fram á haust. Hann sé nú snúinn aftur til starfa.

„Ég myndi benda þér á að heyra í sveitarstjóranum með þetta. Hann á að geta skýrt fyrir þér hvað lá að baki. Þennan gjörning sem þeir fóru út í,“ segir Bjarni.

Hann var á vakt þegar blaðamaður heyrði í honum hljóðið og telur sig enn vera með vinnu.

„Ég veit ekki betur. Þeir þurfa þá að losa sig við mig ef þeir ætla sér að gera það. Þetta kemur til af veikindum sem ég var að berjast við í fyrra alveg fram á haust. Þeir vilja koma mér í veikindaleyfi. Ég hef aldrei beðið um veikindaleyfi. Þeir tóku ákvörðun að setja mig í það. Ég er ekki kominn í það enn.“

Bjarni bendir á að með því að auglýsa stöðu slökkviliðsstjóra hafi ekki verið farið að lögum nr. 75/2000 þar sem segi að aðstoðarslökkviliðsstjóri standi vaktina í fjarveru slökkviliðsstjóra.



Sveitarstjórn ræður slökkviliðsstjóra. Slökkviliðsstjóri ræður annað starfslið slökkviliðsins. Í forföllum slökkviliðsstjóra er varaslökkviliðsstjóri yfirmaður slökkviliðs.

„Það er skrýtið. Þegar auglýst er eftir kennurum þá þarf fólk með réttindi. En svo er skautað framhjá því þegar um slökkviliðsstjóra er að ræða.“

Kannast ekki við óánægju

Gunnlaugur A. Júlíusson, sveitarstjóri Borgarbyggðar, segist ekki kannast við óánægju innan slökkviliðsins. Hann segir það rétt að Bjarni sé á leið í veikindafrí.

„Þegar fólk veikist fer það oft í veikindaleyfi, sem er mjög eðlilegur hlutur,“ segir Gunnlaugur. Veikindaleyfið á að standa yfir í sex mánuði.

„Starf slökkviliðsstjóra er þess eðlis að þar þurfa menn að vera við hestaheilsu, bæði sín vegna og annarra.“

Hann sagði einnig að enn væri verið að vinna málið og það væri ekki komið í gegn enn. Hann vildi ekki tjá sig nánar.

Þörf á úrbótum

Mannvirkjastofnun gerði úttekt á Slökkviliði Borgarbyggðar árið 2016. Þar kom fram að ekki hafði verið bætt úr ýmsum atriðum eftir úttekt stofnunarinnar árið 2013.



Reykkafarar höfðu hvorki farið í læknisskoðun né þrek- og styrktarpróf í samræmi við kröfur laga. Umsýsla um reykköfunarbúnað og loftþjöppu var ekki í samræmi við lög. Bæta þurfti eldvarnaeftirlit og ekki hafði áformum um úrbætur varðandi framkvæmd brunavarnaráætlunar verið fylgt eftir. Enginn hafði verið ráðinn í eldvarnareftirlit.

Þá kom einnig fram að menntun slökkviliðsins væri ekki í samræmi við gildandi brunavarnaáætlun. Upplýsingar um vatn fyrir slökkvivatn væri ekki í samræmi við lög og yfirfara þyrfti allan hlífðarbúnað slökkviliðsmanna og ganga úr skugga um að hann uppfyllti kröfur.

„Mannvirkjastofnun vekur athygli á að í bréfi dags. 15.5.2013 voru gerðar sömu athugasemdir varðandi slökkvivatn, menntun slökkviliðsmanna, reykköfunarbúnað, loftpressu, hlífðarfatnað og framkvæmd eldvarnaeftirlits og þeim tilmælum beint til sveitarstjórnar að úrbætur yrðu gerðar sem fyrst,“ segir í úttekt Mannvirkjastofnunar.