Tyrkir vara Frakka við hernaðarinngripi í Sýrlandi

Varnarmálaráðherra Tyrkja, Nurrettin Canikli, varaði í dag forseta Frakklands, Emmanual Macron, við því að senda herlið til Sýrlands.

„Ráðist Frakkar í hernaðaraðgerðir í norðurhluta Sýrlands væri það ólögmætt og brot á alþjóðalögum. Í raun væri það innrás,“ segir Canikli. Það hefði alvarlegar afleiðingar í för með sér hefðu Frakkar í hyggju að „styðja hryðjuverkasamtök“ með veittri vernd. Þetta hefur fréttaveita AFP eftir Canikli sem er í heimsókn í Giresun-héraði í Tyrklandi.

Mikil spenna ríkir á milli Frakklands og Tyrklands eftir að Macron bauðst til þess að hafa milligöngu um viðræður Tyrkja og hersveita Kúrda í Sýrlandi. Tyrkir höfnuðu því boði í gær.

Macron lýsti yfir stuðningi Frakka við SDF, hersveitir Kúrda og Araba í Sýrlandi og vill hefta sókn Tyrkja í Sýrlandi. Aðgerðir Tyrklandshers í Norður-Syrlandi hafa einkum beinst gegn YPG, her Kúrda en Tyrkir hafa haldið því fram að YPG sé hernaðararmur Verkamannaflokks Kúrda PKK.

Hvorki NATO né Evrópusambandið deila þeirri skoðun með Tyrkjum.