Þögul mótmæli á annað hundrað manns við velferðarráðuneytið

Notendur Hugarafls og Geðheilsu – Eftirfylgdar stóð fyrir þöglum mótmælum við velferðarráðunetið í Skógarhlíð klukkan 13 í dag. Á annað hundrað manns mættu til að mótmæla lækkun á styrkjum til Hugarafls sem útlit er fyrir að skerðist um 2,5 milljónir króna í ár.

Þá ríkir óvissa um húsnæðismál samtakanna en Hugarafl starfar í húsi Geðheilsumiðstöðvar sem ákveðið hefur verið að leggja niður.

„Ég trúi ekki öðru en að þetta sé skilningsleysi á hversu mikilvæg þessi starfsemi er. Við erum að skila fólki aftur á vinnumarkað, aftur í skóla. Þetta er sá staður á landinu þar sem er verið að koma í veg fyrir varanlega örorku og margt margt fleira. Mér finnst mjög skrýtið að þetta sé að gerast,“ sagði Fanney Björk Ingólfsdóttir, formaður Unghuga, í samtali við fréttastofu á dögunum.

Mótmælendur standa fyrir utan ráðuneytið en óvíst er hvort þeir nái eyrum Ásmundar Einars Daðasonar ráðherra sem mun ekki vera á svæðinu.

Fjallað verður nánar um mótmælin í kvöldfréttum Stöðvar 2.