Talið að 25 hafi fallið í óeirðunum í Níkaragva

Mannréttindasamtök í Níkaragva segja 25 hafa fallið og hundruð hafa slasast í átökunum þar í landi nú þegar fimm dagar eru liðnir frá því að stjórnvöld boðuðu umdeildar breytingar á almannatryggingakerfinu. Fréttastofan Reuters greinir frá því að hinir látnu hafi verið á aldrinum 15 til 34 ára.

Hörð mótmæli brutust út í höfuðborginni Managua í kjölfar þess að breytingarnar voru kynntar en aukin harka hefur færst í átökin þegar fimm dagar eru liðnir. Breytingarnar fela í sér skerðingu á lífeyri og annarra bóta ásamt  hækkun á iðgjöldum launþega.

Vísir sagði frá því í gær að stjórnvöld hafi lokað fyrir útsendingar þriggja sjónvarpsstöðva sem sýndu beint frá mótmælunum.

Á meðan að beinni útsendingu af átökunum stóð var innlendur fréttamaður skotinn til bana. Myndbandið hefur farið eins og eldur í sinu á samfélagsmiðlum í Níkarakva.

Mótmælin sem standa yfir í landinu eru þau mannskæðustu frá því forsetinn Daniel Ortega tók við embætti árið 2007.