Ljósmynd af skíðamönnum á Ísafirði stökkbreytist í lag

Ljósmynd af skíðamönnum á Ísafirði umbreytist í tónverk og fer sem eldur í sinu um netið. Meðal annars er myndin komin á Reddit, sem er ein helsta vefsíða veraldar. Hér er um fordæmalausan samruna listgreina að ræða.

Haukur Sigurðsson ljósmyndari með meiru tók magnaða ljósmynd af skíðamönnum í Fossvatnsgöngunni á Ísafirði og birti á Facebooksíðu sinni. Myndin er tekin úr mikilli hæð og sýnir skugga göngumannanna og það minnti helst á nótur á nótnablaði.

„Þetta er skemmtilegt,“ segir Haukur. „Ég tók bara myndina en það merkilega er það sem fólk er að gera með myndina.“

Fyrst tók Stefán Freyr, ísfirskur tónlistarmaður og gítarleikari, sig til og spilaði lag eftir þeim nótum sem hann þóttist greina á myndinni.

Nördar á Reddit spreyta sig á útsetningum

Haukur segir að seinna hafi einhver tekið sig til og birt þetta á Reddit. „Þar hópuðust að einhverjir nördar sem fóru að spila þetta og útsetja. Það er komið fullt af útgáfum,“ segir Haukur og honum er skemmt yfir því hvernig þróunin hefur verið.

Haukur telur einsýnt að þetta hljóti að verða Fossvatnslagið 2019, þessi óvænti samruni listgreina.

„Já, það var einhver hér á Ísafirði sem nefndi að þetta væri sjálfsmynd Ísafjarðar, sem vill kenna sig við skíði og tónlist. Einhvern veginn sjálfssprottin sjálfa.“

Vill ekki sjá mannfjölda á Vestfjörðum

Haukur er menntaður mannfræðingur og er búsettur á Ísafirði ásamt fjölskyldu sinni hvar hann rekur sitt fyrirtæki þar sem snýr einkum að ljósmyndun, myndbandsgerð og markaðsmálum fyrir Vestfirði. Hann sér meðal annars um samfélagsmiðla Visit Westfjords, sem miða að því að segja frá og sýna vestfirska menningu og náttúru.

Vestfjarðarkjálkinn hlýtur að vera næstur á dagskrá í tengslum við straum ferðamanna um landið nú þegar ferðamennirnir sjálfir eru farnir að kvarta undan mannfjölda. Eða hvað? Haukur er reyndar ekkert endilega á því þó hann starfi við markaðsmál sem snúa að ferðamennsku fyrir Vestfirði.

„Við viljum ekkert þennan mannfjölda. Fínt eins og þetta er. Mig hryllir við þeirri tilhugsun að þetta verði eins og Suðurlandið. Sjarmi Vestfjarða er einmitt sá að hér getur maður verið svolítið eins og Palli var einn í heiminum.“