Heldur sljákkar í veðurleiðindum

Einar Sveinbjörnsson veðurfræðingur segir að nú taki að sljákka í þessum kalsa í veðrinu.

„Veður fer að lagast hvað hita varðar. Spáð ágætu á morgun, víða 7-9 stiga hita á láglendi, þó skýjað verði og einhver úrkoma, reyndar samfelld um austurhluta landsins,“ segir Einar í samtali við Vísi.

En, það er svo sem engin sælutíð í vændum næstu daga þó hitastigið skáni.

„Áfram er þó spáð lægðum að minnsta kosti fram að helgi, vindasamt með köflum og úrkoma. Eitthvað hlýrra, en heldur samt áfram að snjóa í hæstu fjöll í stað vorleysingar sem oft, en alls ekki alltaf, er farin af stað þegar vika er af maí.“

Einar segist ekki hafa á hraðbergi upplýsingar um hvort þetta vor fari í sögubækur sem eitt hið leiðinlegasta veðurfarslega.