Vilja tala við mann með hulið andlit í tengslum við bensínsprengjuárásina

Lögreglan á höfuðborgarsvæðinu óskar eftir að ná tali af manninum sem sést í meðfylgjandi myndbandi í þágu rannsóknar. Samkvæmt heimildum fréttastofu tengist það rannsókn á því að bensínsprengju var kastað inn um glugga íbúðar í Súðavogi skömmu eftir miðnætti sunnudagsins síðasta.

Þeir sem þekkja til mannsins, eða vita hvar hann er að finna, eru vinsamlegast beðnir um að hafa samband við lögreglu í síma 444 1000, en upplýsingum má einnig koma á framfæri í einkaskilaboðum á fésbókarsíðu Lögreglunnar á höfuðborgarsvæðinu.

Í íbúðinni sem um ræðir búa hjón af erlendu bergi brotin og tókst þeim að ráða niðurlögum eldsins sem kom upp eftir að bensínprengjunni var kastað inn í íbúðina.

Í samtali við Vísi í gær sagði Margeir Sveinsson aðstoðaryfirlögregluþjónn að lögreglan hefði tvo menn grunaða vegna málsins, en þeir hafa ekki komið í leitirnar enn sem komið er.