Pálmi fór í Crossfit og segir meira frjálsræði skila mörkum

Pálmi Rafn Pálmason, miðjumaður KR, mætir til leiks í Pepsi-deildinni þetta árið í fantaformi. Pálmi fór í Crossfit í vetur og segir að frjálsræði hans á miðjunni sé að skila mörkum.

„Eðlilega voru breytingar gerðar sérstaklega þar sem maður var kannski ekki búinn að standa undir þeim væntingum sem voru gerðar til manns,” sagði Pálmi í samtali við Hörð Magnússon í Sportpakkanum á Stöð 2 í kvöld.

„Það var eðlilegt og sjálfsagt. Ég æfði vel í vetur og fór til Hennings í Crossfit Granda að láta hann djöflast í mér fyrir áramót. Ég fékk góðan grunn þar.”

Pálmi er kominn með þrjú mörk í þremur leikjum í Pepsi-deildinni og virkar funheitur.

„Það er aðeins meira frjálsræði fram á við þó að varnarlega þurfi maður að sinna sinni vinnu. Ég held að það sé stærsta skýringin á þessu.”

KR mætir Breiðablik í stórleik annað kvöld og Pálmi er spenntur að fá topplið Blika í heimsókn.

„Það verður gaman að fara spila fyrir okkar stuðningsmenn heima. Þeir eru búnir að mæta vel hingað til og við erum þakklátir fyrir það. Vonandi verður fullur völlur á morgun og við getum glatt þá á móti hörkuliði Blika.”

„Það eru miklu meiri gæði í deildinni og bæði hjá leikmönnum og þjálfurum sem og umgjörð. Metnaðurinn er orðinn miklu, miklu meiri og við erum ekkert langt á eftir hinum Norðurlöndunum.”

Innslagið má sjá hér að ofan í heild sinni.