Vilja aukna lýðræðisvæðingu í borginni

Líf Magneudóttir, oddviti Vinstri hreyfingarinnar – græns framboðs, og Sanna Magdalena Mörtudóttir, oddviti Sósíalistaflokks Íslands, vilja lýðræðisvæðingu í borgarstjórn.

„Hlutverk stjórnvalda er að byggja brýr til fólksins og við höfum talað um það í Vinstri grænum að við þurfum að stokka kerfið upp að þessu leyti og í rauninni lýðræðisvæða það miklu meira þannig að fólk hafi betri aðkomu að ákvarðanatöku, sama hvar það er statt í lífinu,“ segir Líf sem var auk Sönnu gestur í útvarpsþættinum Harmageddon í morgun.

Lýðræðisvæðing og valdefling hinna valdlausu var raunar meginumfjöllunarefnið á kaffisamsæti Sósíalistaflokksins í gær. Sanna mælti sér ekki mót við neinn flokksformannanna í gær því samtal við baklandið var sett í forgang.

Flokkarnir sem fengu kjörna menn inn í borgarstjórn í nýafstöðnum borgarstjórnarkosningum þurfa nú að huga að því að mynda meirihlutastjórn. Sanna segir að myndun meirihluta hafi alls ekki verið efst á blaði á fundi með baklandinu í gær. Meginstefið hafi þvert á móti verið að valdefla hina valdlausu og ræða leiðir til að tengjast betur hagsmunasamtökum. Sanna segir að fólkið í „hinni Reykjavík“, eins og Sósíalistar hafa komist að orði í kosningabaráttunni, upplifi tengslaleysi við borgarstjórnina og finnist kerfi borgarinnar ekki þjóna hagsmunum sínum.

„Þar erum við að tala um láglaunafólk, öryrkja, fátækt fólk, innflytjendur og lífeyrisþega. Hvernig getum við þjónað þessu fólki og unnið með þeim? Það er helsta markmiðið okkar. Eftir þetta kaffisamsæti í gær þá fannst okkur umræðan alltaf fara inn á sviðið um að mynda strax meirihluta og minnihluta og að allir séu einhvern veginn í þannig samræðum en við erum öðruvísi flokkur – við gerum hlutina allt öðruvísi en hinir og brjótum þessar óskráðu reglur – og við viljum leggja áherslu á, kannski ekki endilega að hlaupa strax í þessar umræður um meirihluta og minnihluta með hinum oddvitunum heldur meira að hugsa um það hvað fólkið vill að við gerum. Hvernig við getum best nýtt stöðu okkar til að koma röddum þeirra áfram,“ segir Sanna.

Að sögn Sönnu er fyrsta skrefið að meta það hvort þau geri meira gagn í meirihluta eða minnihluta og til standi að gaumgæfa alla möguleika. Aðspurð segir hún jafnframt að það komi til greina að verja meirihlutastjórn gegn því að ná fram tilteknum málum en engin ákvörðun liggur þó fyrir um þetta að svo stöddu. Efst á blaði hjá Sósíalistaflokknum í borgarstjórn er að bæta kjör hinna verst settu og að leysa húsnæðisvandann.

Það sem Vinstri hreyfingin – grænt framboð leggur áherslu á í viðræðum flokkanna um myndun meirihluta er félagsvæðing húsnæðiskerfisins, að vinda ofan af eignamarkaðinum og að jafna aðstöðumun barna. Líf vill taka skref í átt til endurgjaldslauss menntakerfis, það sé leið til þess að mæta fátæku fólki og koma í veg fyrir að börnum sé mismunað eftir efnahag foreldranna.

Líf hitti oddvita fráfarandi meirihluta í borginni auk oddvita Viðreisnar í óformlegu spjalli í gær. Sjá nánar: Tvær fylkingar funda

Hún segir að komandi kjörtímabil verði kjörtímabil uppskeru. „En svo er auðvitað gaman að það verður náttúrulega nýr meirihluti sem tekur við, hvernig sem fer,“ segir Líf sem bendir á að það eru fjölmargir möguleikar í stöðunni.