Tveggja bíla árekstur á Suðurlandsvegi

Tveggja bifreiða árekstur varð á Suðurlandsvegi við Steina um klukkan sex í dag. Sex einstaklingar voru í þessum tveimur bifreiðum og var þyrla Landhelgisgæslunnar kölluð út. Ásgeir Erlendsson upplýsingafulltrúi Landhelgisgæslunnar staðfesti í samtali við Vísi að þyrlan væri lögð af stað en útkallið var svo afturkallað.  

„Það er búið að afturkalla þyrluna, það kom í ljós að ekki var þörf,“ segir Frímann Baldursson hjá lögreglunni á Selfossi í samtali við Vísi. Hann segir að aðilarnir í bílunum tveimur séu ekki taldir alvarlega slasaðir, en lögregla er enn á vettvangi. Allir farþegarnir voru þó komnir út úr bílunum.

„Bílarnir enduðu fyrir utan veg þannig að það eru ekki umferðartafir.“

Lögregla gat ekki gefið frekari upplýsingar um málið að svo stöddu.