Velferðarráðuneytið brást ekki nógu vel við

Velferðarráðuneytið gerði ekki fullnægjandi ráðstafanir með vísan til til yfirstjórnunar- og eftirlitsheimilda sinna til að upplýsa það hvor og þá hvaða grundvöllur væri fyrir þeim ávirðingum sem bornar voru á Barnaverndarstofu og starfsmenn hennar og þá  einkum forstjóra hennar. Þetta er niðurstaða óháðrar úttektar á málsmeðferð og efnislegri athugun velferðarráðuneytisins í kjölfar kvartana barnaverndarnefnda á höfuðborgarsvæðinu vegna Barnaverndarstofu og forstjóra hennar.

Í úttektinni kemur fram að þær ávirðingar sem settar voru fram og beindust að störfum forstjórans hafi verið þess eðlis að ráðuneytinu bar að afla frekari upplýsinga um þær til þess að það gæti tekið afstöðu til þess hvort tilefni væri að hefja frekari athugun á störfum forstjórans hjá Barnaverndarstofu og þá eftir atvikum hvort leggja ætti málið í formlegan farveg samkvæmt lögum um réttindi og skyldur opinberra starfsmanna, eða taka ákvörðun um að aðhafast ekki frekar.

Í úttektinni er tekið fram að það sé talið hæpið að ráðuneytið hafi í ljósi þeirra takmörkuðu gagna sem það hafði aflað við meðferð málsins verið í aðstöðu til að fullyrða að forstjórinn hafi farið „út fyrir verksvið sitt“ með því að beina málinu ekki til embættis sýslumannsins á höfuðborgarsvæðinu þegar ljóst varð að um ágreining vegna umgengni væri að ræða. 

Niðurstaðan var kynnt á blaðamannafundi klukkan 11 í Þjóðminjasafninu en úttektina má lesa hér. 

Upphaf málsins má rekja til umfjöllunar Stundarinnar um að Bragi Guðbrandsson hafi sem forstjóri Barnaverndarstofu hlutast til í máli sem var til meðferðar hjá barnaverndarnefnd á höfuðborgarsvæðinu. Í umfjölluninni kemur fram að ráðherra hafi haft ítarlegar upplýsingar um afskipti Braga og þrýsting sem hann er sakaður um að hafa beitt barnaverndarstarfsmann. Þá er ráðherra sagður ekki hafa tekið tillit til þess þegar Bragi var útnefndur fulltrúi Íslands hjá Barnaréttarnefnd sameinuðu þjóðanna.

Kjartan Bjarni Björgvinsson, dómari við Héraðsdóm Reykjavíkur, stýrði úttektinni ásamt Kristínu Benediktsdóttur, dósent við lagadeild Háskóla Íslands.

Úttektin var gerð að tillögu Katrínar Jakobsdóttur forsætisráðherra en Ásmundur Einar Daðason, félags- og jafnréttismálaráðherra, hafði óskað eftir því að farið yrði í úttektina.

Kjartan Bjarni hefur reynslu af óháðum úttektum. Þeir Finnur Þór Vilhjálmsson, saksóknari hjá héraðssaksóknara, skipuðu Rannsóknarnefnd á vegum Alþingis sem falið var að skoða einkavæðingu Búnaðarbankans á sínum tíma.

Fréttin hefur verið uppfærð.