Flutt á sjúkrahús skömmu eftir að hún losnaði úr fangelsi

Heather Locklear var lögð inn á sjúkrahús nokkrum klukkustundum eftir að henni var sleppt úr fangelsi í gær. Leikkonan hafði verið handtekin fyrir að ráðast á lögreglumann og sjúkraflutningamann sem höfðu sinnt útkalli á heimili hennar.

Locklear hafði verið ofurölvi við handtökuna og var að rífast við vini og fjölskyldumeðlimi þegar viðbragðsaðilar mættu á staðinn. Hún þurfti aðeins að vera í 12 klukkustundir í fangelsi eftir árásina og yfirgaf hún svo fangelsið á náttfötum.

Lögregla og sjúkrabíll voru svo aftur kölluð að heimili Locklear í gær vegna þess að svo virtist sem hún hefði tekið of stóran skammt. Lögregla staðfesti útkallið við slúðurmiðilinn People en vildi ekki gefa upp ástand leikkonunnar.

Fyrir viku síðan var Locklear einnig flutt á sjúkrahús. Þá var hún sett í geðmat eftir ofbeldisfulla hegðun gagnvart foreldrum sínum. Þau hringdu á lögreglu og óskuðu eftir aðstoð. Síðustu mánuðir hafa verið erfiðir hjá henni en í febrúar var hún handtekin fyrir heimilisofbeldi og fyrir að ráðast á lögregluþjón. Locklear er 56 ára gömul og er ef til vill þekktust fyrir leik sinn í sjónvarpsþáttunum Melrose Place og Dynasty.