Börn bitin af hákörlum í New York

Talið er að hákarlar hafi bitið tvö börn sem synt höfðu í sjónum við New York-ríki í Bandaríkjunum á dögunum. Ef rétt reynist er um að ræða fyrstu hákarlaárásirnar í ríkinu í 70 ár.

Börnin, 12 ára stelpa og 13 ára strákur, hafa bæði verið útskrifuð af sjúkrahúsi. Þau höfðu bæði fengið lítil stungusár á lappirnar og búist er við því að þau muni ná sér að fullu. Úr sári drengsins var dregin það sem virðist vera lítil tönn, tönn sem talin er hafa verið í skolti lítils hákarls. Tönnin hefur verið send til greiningar og búist er við niðurstöðum á næstu vikum.

Árásirnar eru ekki taldar tengjast með beinum hætti, þær áttu sér stað með nokkurra daga millibili og rúmlega 3 kílómetrar eru á milli svæðanna þar sem börnin slösuðust.

Stúlkan segist í samtali við fjölmiðla ytra vera handviss að um hákarl hafi verið að ræða. Hún hafi fundið fyrir sársauka í fætinum og tekið þá eftir því að hann var allur blóðugur. Því næst hafi hún rekið auga í ugga á því sem virtist vera um eins metra langur hákarl.

Sem fyrr segir eru hákarlaárásir gríðarlega sjaldgæfar í ríkinu. Aðeins er vitað um 10 tilfelli, það síðasta árið 1948.

Hér að neðan má sjá frétt ABC um málið.