Berjast um ösku leiðtogans

Aðstandendur Shoko Ashara, sértrúarsafnaðarleiðtogans sem tekinn var af lífi í síðustu viku, berjast nú um hver þeirra skuli fá að eiga brenndar líkamsleifar hans. Aska Ashara er geymd í fangelsinu í Tókýó þar sem hann var hengdur ásamt sex meðlimum safnaðarins Aum Shinrikyo. Þeim var gefið að sök að hafa staðið á bakvið mannskæða eiturefnaárás í neðanjarðarlestarkerfi borgarinnar árið 1995.

Stjórnendur fangelsins óttast nú að aðstandendur Ashara kunni að reyna að brjótast inn í fangelsið og stela öskunni í einhvers konar hefndaraðgerðum fyrir aftökuna. Fangelsið hefur verið undir miklu eftirliti síðustu daga á meðan stjórnendur þess hafa verið að ráða ráðum sínum.

Dóttir leiðtogans segir að hann hafi lofað sér að hún fengi að eiga ösku hans að honum látnum. Hún er sögð í þarlendum miðlum hafa sagt skilið við söfnuðinn og eigi þar af leiðandi í litlu og stirðu sambandi við móður sína og systkini.

Þau hafa öll farið formlega fram á að fá forræði yfir öskunni. Fjölskyldan gefur lítið fyrir yfirlýsingar dótturinnar, enda hafi Ashara ekki verið í andlegu ástandi til að gefa nein loforð.

Sjá einnig: Meðlimir sértrúarsafnaðar teknir af lífi

Önnur dóttir mannsins sagði þannig á bloggsíðu sinni að hann hafi undir það síðasta átt erfitt með að tjá sig. Hann hafi verið „brotinn einstaklingur“ og því ætti ekki að taka meint loforð hans til dóttur sinnar alvarlega.

Sértrúarsöfnuðurinn var bannaður í Japan eftir fyrrnefnda árás í mars árið 1995, sem dró 13 manns til dauða og særði þúsundir. Hópurinn kom pokum fullum af taugaefninu saríngasi fyrir í neðanjarðarlestum. Eftir nokkrar mínútur byrjuðu pokarnir að leka og gasið fyllti klefa lestanna. Farþegarnir fundu þá til særinda í augum og öndunarfærum áður en þeir féllu til jarðar. Flestir köstuðu upp og aðrir köfnuðu, blinduðust eða lömuðust.

Söfnuðurinn leit dagsins ljós á níunda áratugnum og reiddi sig í fyrstu á kenningar úr hindúisma og búddisma. Eftir því sem árin liðu innleiddi hann fleiri þætti úr heimsendaspám kristninnar í kennisetningar sínar. Leiðtogi safnaðarins, títtnefndur Shoko Ashara, leit á sig sem Jesú Krist endurfæddan og þann fyrst sem telja mætti sem „uppljómaðan“ frá því að Búdda var og hét.

Þegar mest lét töldu meðlimir safnaðarins nokkra tugi þúsunda. Hann hvarf hins vegar af sjónarsviðinu eftir árásina árið 1995 og söfnuðurinn skipti að endingu um nafn.