Íslandsmeistararnir á toppinn

Þór/KA tók toppsæti Pepsi deildar kvenna með tveggja marka sigri á ÍBV á Akureyri í dag. Arna Sif Ásgrímsdóttir og Hulda Björg Hannesdóttir gerðu mörk Þórs/KA.

Íslandsmeistararnir voru fyrir leikinn einu stigi á eftir Blikum á toppnum. ÍBV sat í fimmta sæti með 14 stig, liðið hefur ekki náð sér á strik í sumar.

Heimakonur komust yfir á 22. mínútu leiksins. Arna Sif Ásgrímsdóttir skallaði hornspyrnu Andreu Mistar Pálsdóttur í netið og staðan var 1-0 fyrir Þór/KA í hálfleik.

Í seinni hálfleiknum bætti Hulda Björg Hannesdóttir við öðru marki heimakvenna, aftur eftir hornspyrnu.

Fleiri urðu mörkin ekki og Þór/KA fer á toppinn, að minnsta kosti þar til á þriðjudag þegar Blikar mæta HK/Víkingi. ÍBV gæti fallið niður töfluna ef önnur úrslit verða þeim óhagstæð.

Upplýsingar um úrslit og markaskorara eru fengnar frá Fótbolta.net.