Vætusamt næstu daga

Lægðin sem hrellti landsmenn á Suður- og Vesturlandi í gærkvöldi og nótt heldur af landi brott í dag. Hvassviðri næturinnar er því að ganga niður en áfram verður hvasst og hviðótt á norðanverðu hálendinu þar sem hviður gætu farið nærri 40 m/s og er gul viðvörun í gildi þar til kl. 12.

Eins og vill gerast með skil fylgir þeim væta, en víða má búast við úrkomu í dag, einkum sunnan- og suðaustantil þar sem stefnir í talsverða rigningu fram yfir hádegi.

Hitinn í dag verður á bilinu 9 til 16 stig.

Veðurfræðingur á Veðurstofu Íslands segir að í kjölfar skilanna komi suðvestlæg átt og skúrir um landið sunnan- og vestanvert en undir kvöld ætti að létta til norðaustanlands.

Það stefnir svo í stífa suðvestanátt með skúrum á morgun. Þó verður bjart norðaustanlands en á sunnudaginn á búast við vestlægri átt. Áfram verður væta um allt vestanvert landið. 

Veðurhorfur á landinu næstu daga

Á laugardag:

Suðvestlæg átt, víða 10-15 m/s, og rigning eða skúrir, en bjartviðri NA- og A-til. Hiti 7 til 14 stig, hlýjast á A-landi. 

Á sunnudag:

Vestan strekkingur S-lands, annars hægari. Væta um landið vestanvert, en bjartviðri að mestu A-lands. Hiti 7 til 12 stig. 

Á mánudag:

Suðlæg átt og fer að rigna S- og V-lands þegar líður á daginn, en úrkomulítið í öðrum landshlutum. Hiti breytist lítið. 

Á þriðjudag:

Suðvestlæg átt og væta með köflum, en úrkomulítið NA-til. Hiti 7 til 13 stig. 

Á miðvikudag:

Norðlæg eða breytileg átt og skýjað en úrkomulítið fyrir norðan og kólnar í veðri. Rofar til sunnan heiða og hiti 8 til 13 stig. 

Á fimmtudag:

Útlit fyrir suðlæga átt með rigningu víða, einkum V-lands, og hlýnar í veðri.