Endurhæfingarstöð fyrir ránfugla meðal styrkþega Landsbankans

Tólf verkefni hlutu umhverfisstyrki úr Samfélagssjóði Landsbankans í gær. Fjögur verkefni fengu 650 þúsund krónur hvert og átta verkefni 300 þúsund krónur, samtals fimm milljónir króna.

Í tilkynningu frá bankanum segir að umhverfisstyrkjunum sé ætlað að styðja við verkefni á sviði umhverfismála og náttúruverndar. 

„Dómnefnd leitast við að velja metnaðarfull verkefni sem hafa skýra þýðingu fyrir íslenska náttúru og vistkerfið,“ segir í tilkynningunni og bætt við að í dómnefndinni hafi setið Dr. Brynhildur Davíðsdóttir, dósent í Umhverfis- og auðlindafræðum við Háskóla Íslands, Finnur Sveinsson, sérfræðingur í samfélagsábyrgð og Dr. Guðrún Pétursdóttir, forstöðumaður stofnunar Sæmundar fróða um sjálfbæra þróun við Háskóla Íslands, en hún var jafnframt formaður nefndarinnar.

 

Eftirtaldir hlutu umhverfisstyrki úr Samfélagssjóði bankans að þessu sinni:

 650.000 króna styrkir

•  Landsskógar ehf. – Responsible Iceland
  
  Styrkurinn er veittur til verkefnisins „Responsible Iceland“ sem gengur út á að fá ferðamenn til að jafna kolefnisfótspor sitt vegna ferðalaga með framlagi til skógræktar og/eða annarrar landbætingar.

•  Endurhæfingarmiðstöð fyrir slasaða villta fugla - Diana Divileková
  
  Styrkurinn er veittur til að útbúa aðstöðu til meðhöndlunar og endurhæfingar á  slösuðum eða veikum ránfuglum.

•  Landvernd – Námsefni um matarsóun fyrir grunnskólanema
  
  Styrkurinn er veittur til að útbúa námsefni fyrir miðstig grunnskóla um matarsóun.

•  Björgunarsveitin Ársæll – Hreinsun strandlengju höfuðborgarsvæðisins
  
  Björgunarsveitin Ársæll hlýtur styrk til að hreinsa plast og annað rusl úr sjónum og meðfram strandlengjunni við höfuðborgarsvæðið.

300.000 króna styrkir

•  Vistorka – Græna trektin
  
  Styrkurinn er veittur til að auka útbreiðslu á grænu trektinni, sem er olíu og fitusöfnunarílát fyrir heimili. Fitunni og olíunni er svo breytt í umhverfisvænt eldsneyti sem kallast Lífdísill.

•  Þorvarður Árnason – Hopun jökla á Suðausturlandi
  
  Styrkurinn er veittur til að gera fræðslu- og kynningarefni um hopun íslenskra jökla af völdum loftslagsbreytinga.

•  Alda Jónsdóttir – Bætt aðgengi að Sveinsstekksfossi
  
  Styrkurinn er veittur til að bæta merkingar við Sveinsstekksfoss. Fossinn fellur í Fossá í Fossárdal í Berufirði og verða skilti sett upp við helstu áningar- og útsýnisstaði með upplýsingum um hættur sem ber að varast og öruggar leiðir.

•  Jökuldalur – Stuðlagil, aðgengi og öryggi
  
  Styrkurinn er veittur til að bæta aðstöðu við Stuðlagil. Stuðlagil er í árfarvegi Jökulsár á Dal og aðgengi liggur um snarbratt gilið. Nauðsynlegt er að auka öryggi fólks og bæta aðkomu og aðgengi á staðnum þar sem vitund um hið stórfengna Stuðlagil hefur aukist til muna á síðustu árum.

•  Ferðafélag Fljótsdalshéraðs - Sjálfbærar Víknaslóðir
  
  Styrkurinn er veittur Ferðafélagi Fljótsdalshéraðs til að fjármagna úttekt og endurbætur á gönguleiðinni Víknaslóðir. Víknaslóðir er eitt vinsælasta göngusvæði Austurlands og eru stikaðar gönguleiðir á svæðinu um 120 km.

•  Jón Lyngmo – Lagfæring slóða að Höfðaströnd
  
  Styrkurinn er veittur til að laga slóða frá Grunnavík í Jökulfjörðum við Ísafjarðardjúp til Flæðareyrar í Leirufirði.

•  Páll Steinþórsson – Söguskilti
  
  Styrkurinn er veittur til uppsetningar tveggja söguskilta í og við kirkjugarðinn í Arnarbæli í Ölfusi. Arnarbæli var kirkjustaður frá því á 13. öld fram til ársins 1909 en Páll hefur lagfært  kirkjugarðinn í sjálfboðavinnu frá árinu 2013.

•  Gróður fyrir fólk í landnámi Ingólfs – Vistvangur
  
  Samtökin hljóta styrk til verkefnisins Vistvangur þar sem örfoka land er endurvakið til lífs með lífrænum úrgangsefnum og uppgræðslu.