Hanskarnir sem Hannes notaði til að verja víti Messi eru orðnir safngripur

Einn eftirminnilegasti dagurinn í íslensku íþróttalífi á árinu 2018 var þegar íslenska knattspyrnulandsliðið náði jafntefli á móti Argentínu í sínum fyrsta leik frá upphafi í úrslitakeppni HM.

Ísland setti um leið met með því að vera fámennasta þjóðin sem á lið í úrslitakeppni HM.

Hetja íslenska landsliðsins í þessum sögulega leik var markvörðurinn Hannes Þór Halldórsson. Hannes varði nefnilega vítasspyrnu frá sjálfum Lionel Messi í seinni hálfleik og kom í veg fyrir að Argentínumenn tryggðu sér sigurinn.

FIFA Museum, eða safn Alþjóðaknattspyrnusambandsins, tilkynnti á Twitter-síðu sinni í dag að hanskarnir sem Hannes notaði séu nú til sýnis á safninu.

„Það eru ekki margir hanskar sem hafa varið víti frá Messi en hanskarnir hans Hannesar, sem eru nú til sýnis á HM 2018 sýningunni, hafa það svo sannarlega,“ segir í færslunni sem má sjá hér fyrir neðan.

There aren't many gloves that have stopped a penalty from Messi - but Hannes Halldórsson's pair in our 2018 #WorldCup showcase certainly have

Both @HannesHalldors and his @footballiceland team mates stunned the world in their #WorldCup debut with a draw against Argentina. pic.twitter.com/pl5oTyJKnT

— FIFA Museum (@FIFAMuseum) November 26, 2018