Mönnum úr gistiskýlinu boðið í jólaferð um Suðurlandið

Gistiskýlið við Lindargötu var fullnýtt yfir hátíðarnar en ekki þurfti að vísa neinum frá. Til hátíðarbrigða var þeim sem þangað sækja boðið í dagsferð um Suðurlandið.

Gistiskýlið við Lindargötu, sem rekið er fyrir heimilislausa karlmenn í Reykjavik, var fullnýtt um hátíðarnar, líkt og verið hefur undanfarið, en þar eru tuttugu og sex rúm í boði. Ekki þurfti að vísa neinum frá og segir Þór Gíslason, forstöðumaður Gistiskýlisins, að það hafi raunar heyrt til undantekninga í vetur. Sumir nýta þó einungis hálfa nóttina og því eru fleiri en einn sem sitja um hvert rúm.

„Svo erum við búnir að koma okkur upp þeim möguleika að setja niður dýnur ef á þarf að halda," segir Þór.

Að venju var mönnunum boðinn jólamatur.

„Hjálpræðisherinn, eins og venjulega, bauð í hátíðarkvöldverð á aðfangadag og síðan buðu nunnurnar á Ingólfsstræti í hátíðarmat á jóladag," segir Þór og vísar þar til systrana af reglu Móður Teresu, sem hafa starfað í Reykjavík um árabil.

Þá var þeim sem vildu boðið í dagsferð með rútu um Suðurlandið til tilbreytingar. „Það var mjög vel tekið á móti þeim alls staðar. Þeim var boðið í hádegisverð að Skógum og síðan í kvöldverð í Þorlákshöfn. Þetta var virkilega góður dagur og mikil tilbreyting fyrir þá."

„Þetta var bara á vegum einstaklinga sem bæði þekkja til í hópnum og hafa náð sér á strik sjálfir og voru að hugsa til þeirra sem þarna dvelja," segir Þór.

Vanalega er gistiskýlið einungis opið á kvöldin og um nætur en yfir hátíðarnar stendur það opið allan daginn og boðið er upp á konfekt og smákökur. Ekki er þó skipulagður sérstakur hátíðarkvöldverður um áramótin. 

„Það er nú bara ekki neitt meira sem við höfum upp á að bjóða, því miður, en við reynum aðeins að brjóta þetta upp með að vera ekki að vísa út yfir daginn um háhátíðarnar," segir Þór Gíslason, forstöðumaður Gistiskýlisins við Lindargötu.