„Heimskulegasta sem ég hef gert á ævinni“

Artur Pawel Wisocki, 29 ára karlmaður sem ákærður er fyrir stórfellda líkamsárás fyrir utan næturklúbbinn Shooters aðfaranótt 26. ágúst síðastliðinn, segir að dyraverðir og starfsfólk á Shooters hafi komið illa fram við sig og aðra Pólverja á staðnum umrætt kvöld. Það hafi verið upphafið á því sem svo gerðist. 

Artur hefur játað að hafa veitt dyraverðinum hnefahögg en neitar annars sök er varðar líkamsárásina og afleiðingar hennar. Hann er sakaður um að hafa eftir hnefahöggið í andlitið elt dyravörðinn þegar hann reyndi að komast undan og hrint honum.

Hann neitar því að hafa hrint honum, eins og hann er sakaður um í ákærunni. Þar er honum gefið það að sök með þeim afleiðingum að dyravörðurinn féll fram fyrir sig, niður tvö þrep, höfuð hans skall á hurð og hann féll á magann á gólfið. Þar á Artur að hafa veitt honum fleiri hnefahögg og spörk bæði í andlit og höfuð.

Afleiðingarnar voru meðal annars margþætt brot á fimmta hálshryggjarlið, mænuáverkar og meðfylgjandi lömun fyrir neðan háls.

Artur sagðist óviss hvort hann hefði sparkað í hann en viðurkenndi að hafa gert tilraun til þess.

Segir dyravörð hafa dregið upp kylfu

Eftir að hafa yfirgefið Shooters í fússi fór Artur ásamt þremur félögum sínum á Hressó. Í framhaldinu hittu þeir fleiri Pólverja, virðast hafa rætt um virðingarleysið sem þeim var sýnt og ákveðið að snúa aftur á Shooters.

Þetta kom fram í vitnisburði yfir Arturi í Héraðsdómi Reykjavíkur í morgun. Artur er ákærður fyrir stórfellda líkamsárás sem leiddi til þess að dyravörður á staðnum lamaðist fyrir neðan háls. Hann hefur verið í gæsluvarðhaldi síðan hann var handtekinn eftir árásina.

Artur huldi höfuð sitt þegar hann mætti í dómsal í morgun. 

„Ég veit ekki af hverju þeir fóru aftur á Shooters. Það var ekkert plan að fara aftur á Shooters og gera eitthvað. Það er eitthvað sem ég iðrast mest í lífi mínu,“ sagði Artur á pólsku en þýðandi þýddi orð hans jafnóðum yfir á íslensku. 

Artur sagðist hafa farið út að skemmta sér með þremur vinnufélögum sem allir komu til Íslands til að vinna. Þeir hefðu farið á Shooters en strax upplifað óblíðar móttökur.

„Við fundum alveg að það var neikvætt viðhorf dyravarða gagnvart okkur.“

Þeir hafi ætlað að fá sér bjór og eiga skemmtilega stund saman. Stuttu eftir að þeir komu á Shooters hafi það gerst að einum viðskiptavini var hent harkalega út. Í ljós kom að kúnninn var Pólverji, samlandi þeirra.

„Þá komst allt í uppnám. Við stóðum allir upp og einn af dyravörðunum tók upp kylfu. Hann fór að banka með kylfunni í hurðarkarm með ögrandi hætti.“

Fjölgaði í hópnum

Á meðan þessu stóð hafi einhver hent eða stolið bjórnum þeirra. 

„Auðvitað vorum við ekki ánægðir með það. Það kom til orðaskipta milli okkar og starfsmanna. Á meðan sótti einn dyravörðurinn fleiri til að geta hent okkur útaf staðnum.“

Þeir hafi lent í orðaskiptum við dyraverðina fyrir utan Shooters og félagarnir ákveðið að fara á annan bar, Hressó. Þar pantaði Artur sér bjór, tók nokkra sopa áður en fleiri bættust í hópinn. Strákar sem hann þekkti ekki. Einhverra hluta vegna hafi verið ákveðið að fara aftur á Shooters.

„Ég hef enga útskýringu af hverju þetta gerðist. Það urðu einhvers konar mótmæli - við vorum að mótmæla á einhvern hátt. Við fórum aftur á þennan stað. Það kom til ryskinga, kom til slagsmála og svo endaði allt þetta með slysinu.“

Ætluðu sér ekki að valda skaða 

Margrét Unnur Rögnvaldsdóttir, saksóknari hjá héraðssaksóknara, spurði Artur nánar út í atburðarásina umrædda nótt. 

Artur sagði þá hafa verið ósáttir á Hressó með meðferðina sem þeir hefðu fengið á Shooters. Þeir hafi rætt það. Hann myndi ekki hver hefði tekið ákvörðunina að fara aftur á Shooters. Hann iðraðist að hafa farið aftur á Shooters.

Fyrir utan Shooters hafi aftur komið til ryskinga. Artur sagðist hafa átt fyrsta höggið og veitt viðkomandi dyraverði nokkur högg. Dyravörðurinn hafi hlaupið inn á staðinn. Hann hafi hlaupið á eftir honum.

„Við duttum báðir. Hann meiddi sig og ég líka. Ég braut einhverja rúðu með handleggnum mínum,“ sagði Artur en dimmt hafi verið inni og hann því ekki séð rúðuna. Auk þess tók hann fram að hann hefði verið ölvaður þessa nótt þótt hann vissi vel að það væri engin afsökun.

Dyravörðurinn hafi legið á gólfinu. Hann hafi séð að ekki stafaði hætta af dyraverðinum og ákveðið að fara aftur út. Dyravörðurinn hafi mögulega reynt að segja eitthvað. Artur hafi gengið út án þess að segja nokkuð.

„Ég hef ekki gert neitt meira jafnvel þótt dyravörðurinn hefði verið standandi,“ sagði Artur.

Fyrir utan staðinn hafi hann veitt öðrum dyraverði nokkur högg. Þar hafi slagsmál staðið yfir þar sem meðákærði Dawid Kornacki og tveir aðrir sem Artur sagðist ekki kannast við, en væru þó Pólverjar, áttu í hlut. Höggin hafi þó ekki verið alvarleg og ekki ætlað að valda skaða.

„Þetta er það heimskulegasta sem ég hef gert á ævinni. Ég get ekki bætt fyrir það,“ sagði Artur um atburðina umrætt kvöld.

Tekist á um hrindingu

Spiluð var upptaka frá Shooters umrædda nótt. Artur var spurður hvort hann vildi ekki horfa á myndbandið en hann óskaði eftir því að sleppa því. Hann neyddist þó til að horfa á það þegar saksóknari spurði hann út í atburðarásina.

Á upptökum mátti sjá Artur og Dawid á staðnum þegar þeim var vísað út. Svo þegar þeir komu aftur af Hressó og mættu ógnandi á Shooters. Artur réðst þá til atlögu og Dawid sýndi ógnandi hegðun. 

Á myndbandinu sést Artur elta dyravörðinn inn á Shooters en álitamál er uppi hvort hann hafi hrint honum inni á staðnum. 

Sækjandi sagði að á myndbandinu mætti sjá hrindingu með krafti. Artur ítrekaði fyrri svör sín eftir að hafa greint þetta í þaula. Það hafi frekar verið þannig að hann hafi reynt að grípa dyravörðinn frekar en að hrinda honum.

Á erfitt með svefn 

Ómar Örn Bjarnþórsson, verjandi Arturs, spurði Artur út í líðan sína vegna þess sem gerðist umrætt kvöld.

Artur sagði að honum liði mjög illa vegna þess sem gerðist. Honum hefði aldrei liðið svo illa. Hann hugsaði stanslaust um þetta. Hann gæti ekki sofið og iðraðist þess mjög.

„Ég biðst afsökunar,“ sagði Artur.

Tveir óþekktir árásarmenn 

Þá er Artur ásamt öðrum manni, Dawid Kornacki, ákærður fyrir aðra sérstaklega hættulega líkamsárás sömu nótt á sama stað. Tveir aðrir menn eru taldir hafa verið aðilar að árásinni en þeir eru óþekktir. 

Artur og Dawid eru báðir ákærðir fyrir endurtekin hnefahögg í andlit, höfuð og líkama auk þess að hafa sparkað í hann, þar á meðal þrjú hnéspörk í andlit í tilfelli Arturs. Héldu þeir honum, samkvæmt því sem segir í ákæru, svo hann kæmist ekki undan.

Karlmaðurinn sem lamaðist fyrir neðan háls fer fram á 123 milljónir króna í miskabætur af hendi Arturs. Hinn karlinn krefst 2,5 milljóna króna í miskabætur frá þeim Artur og Dawid.