Þetta kemur fram í tilkynningu frá Almenna leigufélaginu.
María Björk Einarsdóttir, framkvæmdastjóri Almenna leigufélagsins, segir að málflutningur Ragnars Þórs um leigufélagið sé óheppilegt innlegg í umræðu um það hvernig megi byggja upp hagkvæman og fjölbreyttan leigumarkað til framtíðar.
Stéttarfélagið VR hefur gefið stjórnendum Kviku banka, sem bíða niðurstöðu samkeppniseftirlitsins um hvort kaup þeirra á Almenna leigufélaginu gangi í gegn, fjögurra daga frest til þess að draga til baka hækkun á leigu á húsnæði félagsins. Verði Kviku banki ekki við þeim kröfum hyggst VR taka allt sitt fé, sem nemur 4,2 milljarða króna, út úr eignastýringu bankans. Þetta kom fram í opnu bréfi sem VR sendi til stjórnenda í dag.
Sjá nánar: Hóta því að taka 4,2 milljarða úr eignastýringu hjá Kviku
Afarkostirnir leið til að sýna leigjendum stuðning í verki
Í kvöldfréttum RÚV sagði Ragnar Þór að með þessu sé VR að sýna í verki að staðið sé með félagsmönnum og fólki á leigumarkaði með því að gefa Kviku banka jafn langan frest og þeir gefa leigjendum til að svara afarkostum um mjög ósanngjarna og hækkaða leigu til að koma í veg fyrir þetta.
„Það hefur verið gert í skrefum og í langflestum tilfellum með rúmum fyrirvara svo leigjendur fái svigrúm til að laga sig að breyttum aðstæðum. Leiguverð hefur einnig fylgt verðbólgu, fasteignagjöldum og öðrum opinberum gjöldum, sem hafa hækkað gríðarlega undanfarin ár með hækkandi fasteignamati,“ segir í tilkynningunni.
Rekstur Leigufélagsins Kletts og BK-eigna hafi ekki staðið undir sér
Árið 2017 tók Almenna leigufélagið við rekstri tveggja fasteignasafna, annars vegar á Leigufélaginu Kletti, sem er í eigu Íbúðalánasjóðs og hins vegar á félaginu BK-eignir. Í tilkynningunni segir að reksturinn hafi ekki staðið undir sér og var tugmilljóna tap af leigurekstri þeirra sama ár. Á meðal skilyrða frá Leigufélaginu Kletti var að leiguverð myndi ekki hækka næstu 12 mánuði. Því hafi Almenna leigufélagið greitt háar fjárhæðir með eignunum.Í fréttatilkynningunni segir að Almenna leigufélagið fagni allri umræðu um leigumarkaðinn á Íslandi og að félagið taki heilshugar undir kröfur VR og fleiri um uppbyggingu á félagslegu leiguhúsnæði og óhagnaðardrifinna félaga. Almenna leigufélagið hafi frá stofnun lagt ríka áherslu á að tryggja einstaklingum og fjölskyldum á Íslandi húsnæðisöryggi til langs tíma, stöðugleika og þjónustu að Skandinavískri fyrir fyrirmynd.
„Orð formanns VR eru því ómakleg árás á fyrirtæki sem tekið hefur þátt í að ryðja brautina fyrir þróun skilvirks leigumarkaðar á Íslandi,“ eru lokaorð fréttatilkynningar frá Almenna leigufélaginu.
