Black Eyed Peas spilar á Secret Solstice

„Það hefur verið draumur hjá mér frá því ég var lítill polli að flytja inn Black Eyed Peas. Þetta er ein allra stærsta hljómsveit seinni ára og hefur verið ein mest spilaða hljómsveitin á skemmtistöðum um allan heim frá upphafi,“ segir Víkingur Heiðar Arnórsson, framkvæmdastjóri Live Events hjá Secret Solstice, en sveitin er þekkt fyrir lög eins og I Gotta Feeling, Let’s Get it Started og fjöldamörg fleiri.

„Black Eyed Peas hefur verið með söluhæstu hljómsveitum frá upphafi og er að toppa sölu hjá listamönnum eins og Nirvana, Bryan Adams, Bob Marley, The Police, Kiss, Robbie Williams og Tupac Shakur,“ útskýrir Víkingur og nefnir einnig að sveitin hafi gefið út lög með listamönnum eins og Justin Timberlake, Britney Spears og Justin Bieber.

Hvergi til sparað í uppsetningu

„Bókunardeildin hjá Secret Solstice 2018 fékk ábendingu frá einum af stærri tónlistarumboðsskrifstofum heims um að Black Eyed Peas væri að taka aftur saman og farin að plana túr. Svo þegar ég kem inn og tek við sem framkvæmdastjóri í nóvember 2018 var upplagt að fá þau inn fyrir Secret Solstice 2019. Þarna náði ég um leið að láta æskudraum minn verða að veruleika! Fyrir mitt leyti er þetta stærsta bókun sem Secret Solstice hefur gert frá upphafi og er ég mjög spenntur að sjá þau.“

Ný plata með sveitinni er væntanleg í apríl og því ætti tímasetning hátíðarinnar, í júní, að henta fullkomlega. Von er á sveitinni ásamt 35 manna fylgdarliði sem samanstendur af hópi af dönsurum, ljósog hljóðmönnum, fararstjóra og fjölmiðlafólki ásamt prívat gæslu. „Þannig að það verður öllu tjaldað til og hvergi til sparað. Héðan fara þau svo beint til Rússlands þar sem þau verða aðalnúmerið á 100 þúsund manna tónleikum.“

Víkingur bendir í lokin á að það sé merkileg staðreynd nú þegar sala á tónlist sé sífellt að færast meira yfir á stafrænt form, að lag sveitarinnar I Gotta Feeling er í 11. sæti yfir mest seldu lög frá upphafi.