Appelsínusalat með lárperu og granatepli

Æðislegt salat sem hægt er að borða eitt og sér eða hafa með kjúklingi. Uppskriftin miðast við fjóra.

100 g spínat

2 appelsínur

2 blóðappelsínur

1 lárpera

1 dl granateplakjarnar

1 rauðlaukur

Fetaostur

Dressing

1 msk. valmúafræ

1 msk. Dijon-sinnep

1 msk. hunang, fljótandi

1 msk. sítrónusafi

3 msk. ólífuolía

Salt og pipar

Ristið valmúafræin á þurri pönnu en það gefur þeim enn meira bragð. Hrærið saman allt annað sem á að fara í dressinguna. Bragðbætið með salti og pipar.

Takið börkinn af appelsínunum og skerið í sneiðar. Takið lárperuna úr hýðinu og skerið í sneiðar. Skerið laukinn sömuleiðis í sneiðar.

Setjið spínat á disk og raðið appelsínum, rauðlauk og lárperu yfir. Því næst er rauðlauk dreift yfir ásamt fetaosti og granateplakjarna. Dreifið salatdressingunni yfir í lokin.