Gyðingar fari huldu höfði á Íslandi

Það eru einna helst tvær ástæður fyrir því að gyðingdómur er ekki með formlega trúfélagsskráningu á Íslandi, að mati ræðismanns Ísraels á Íslandi. Annars vegar að Gyðingar hafi lengi verið án trúarleiðtoga á Íslandi, sem breyttist á síðasta ári með komu fyrsta rabbínans sem hér hefur fasta búsetu. Hin ástæðan er að Ísland er alræmt fyrir andstöðu sína við Ísraelsríki, fyrir vikið vilji íslenskir gyðingar fara huldu höfði hér á landi.

Fjallað var um stöðu gyðingdómsins á Íslandi á vef Ozy í gær. Þar segir meðal annars að erfitt sé að áætla fjölda gyðinga á Íslandi, en talið er að þeir geti verið á bilinu núll og upp í nokkur hundruð. „Ástæðan fyrir hinu nákvæma núlli er nokkuð einföld: Stjórnvöld á Íslandi viðurkenna ekki gyðingdóm sem trúarbrögð hvorki lagalega né opinberlega.“ Fjöldi gyðinga í þjóðskrá sé því eðli máls samkvæmt núll, en gyðingar hér á landi eru flestir sagðir skrá sig utan trúfélaga.

Það hefur því verið í verkahring fyrsta rabbínans með fasta búsetu á Íslandi, Avi Feldman, að breyta því. Allt frá því að hann kom hingað til lands með fjölskyldu sinni í fyrra hefur hann unnið að því að gera gyðingdóm að möguleika við trúfélagsskráninguna í Þjóðskrá, ferli sem sagt er einkennast af skrifræði og fjölda lagalegra hindrana.

Hæstarréttarlögmaðurinn Páll Arnór Pálsson hefur verið rabbínanum til aðstoðar, en Páll er ræðismaður Ísrael á Íslandi. Aðspurður um hvers vegna Gyðingar á Íslandi hafi ekki lagt í skráningarferlið til þessa telur Páll að fyrir því séu fyrrnefndu ástæðurnar tvær: Íslenskir gyðingar hafi verið leiðtogalausir auk þess sem Ísland sé talið hafa horn í síðu Ísraelsríkis.

Í umfjöllun Ozy er þessi andstaða sett í samhengi við Eurovision, sem fram fer í Tel Aviv eftir tæplega tvær vikur. Fulltrúar Íslands hafa boðað gjörning gegn Ísrael, auk þess sem þúsundir Íslendinga kröfðust þess að keppnin yrði sniðgengin með öllu. Þá er sérstaklega minnst á ummæli Páls Óskars Hjálmtýssonar, sem hann lét falla um Gyðinga og Ísrael í upphafi febrúar.



„Ástæðan fyrir því að restin af Evrópu þegir þunnu hljóði er sú að gyðingar eru búnir að sauma sig inn í Evrópu á mjög lúmskan hátt á mjög löngum tíma. Það er alls ekki hip og kúl að vera „pro-Palestína“ í Bretlandi,“ sagði Páll Óskar og bætti við að gyðingar væru orðnir eins og sinn „ógeðslegasti óvinur“ í stað þess að læra af sögunni.

„Tragedían er sú að gyðingar lærðu ekki neitt af Helförinni. Í staðinn umbreyttust þeir í nákvæma afsteypu af sínum ógeðslegasta óvini.“

Bæði Páll og Feldman eru þó vongóðir á að trúfélagsskráningin muni ganga í gegn fljótlega, líklega á næstu 12 mánuðum. Þá verði í fyrsta sinn hægt að fá nákvæmari upplýsingar um fjölda íslenskra gyðinga.

Feldman vinnur auk þess að því að koma á laggirnar fyrstu sýnagógunni á Íslandi, eins og Vísir greindi frá í fyrra. Reykjavík hefur lengi verið eina höfuðborg Evrópu sem ekki hefur haft neinn bænastað fyrir gyðinga eða rabbína.