Fanney Eiríksdóttir látin

Fanney Eiríksdóttir lést í nótt á líknardeild Landspítalans eftir tæplega árs baráttu við leghálskrabbamein. Hún lætur eftir sig eiginmann, Ragnar Snæ Njálsson, og tvö börn.

Fanney greindist með krabbameinið degi eftir 20 vikna sónar þar sem þau hjónin fengu að vita að þau ættu von á dreng. Fyrir áttu þau dótturina Emilý Rósu, fimm ára, og í september á síðasta ári fæddist sonur þeirra Erik Fjólar sem er tæplega tíu mánaða gamall.

Barátta Fanneyjar vakti mikla athygli en hún var staðráðin í því að gefast aldrei upp, sérstaklega barna sinna vegna. Þegar þau fengu fréttirnar að hún væri með krabbamein kom því aldrei til greina að stöðva meðgönguna, þau vildu frekar klára hana og hefja meðferð strax að henni lokinni.

Barátta sem hreyfði við mörgum

Þau Fanney og Ragnar tjáðu sig um ferlið á einlægan hátt í viðtali í Ísland í dag fyrr í vor. Þá hafði meinið dreift sér en það kom ekki í ljós fyrr en Fanney var látin fara í jáeindaskanna, átta mánuðum eftir greiningu.

„Hún fer ekki í jáeindaskanna fyrr en átta mánuðum eftir að hún er greind. Fyrir mér er það eitthvað svo galið. Svo í millitíðinni að fá fréttir úr segulómskoðuninni að þetta líti svo vel út og allt sé í góðum farvegi þegar það er ekki. Mér finnst þetta bara svo undarlegt allt saman,“ sagði Ragnar.

Sjá einnig: Ætlar að gera allt til að vera til staðar fyrir börnin í framtíðinni

Þrátt fyrir þetta gafst Fanney aldrei upp og tileinkaði sér jákvætt hugarfar. Hún sagðist ekki horfa á krabbameinið sem tapaða baráttu þar sem hún ætti tvö yndisleg börn og ætlaði hún að gera allt sem í valdi hennar væri til þess að vera í lífi þeirra eins lengi og mögulegt væri.

„Maður verður bara að reyna að vera jákvæður og hafa húmorinn í lagi. Þetta er bara mitt verkefni og ég þarf bara að takast á við það,“ sagði Fanney.

Fanney lifir í börnunum

Eiginmaður Fanneyjar greindi frá andláti hennar í einlægri færslu á Facebook-síðu sinni þar sem hann sagði Fanneyju hafa verið umkringda fjölskyldu og ástvinum við kveðjustundina. Hún hafi barist fram á síðustu stundu og hafi aldrei gefist upp.

„Þrátt fyrir langt, strangt og ósanngjarnt ferli hafði hún ávallt jákvæðni og bjartsýni að leiðarljósi og sá þetta aldrei sem mögulega niðurstöðu. Meinið tók stakkaskiptum eftir að það komst í beinin, óx á ógnarhraða og áttum við undir lokin því miður við ofurefli að etja. Í dag eru einungis 4-5 dagar síðan við áttuðum okkur á þeirri staðreynd og svo er þetta strax búið,“ segir Ragnar í færslunni.

Hann segist hugga sig við það að nú ríki yfir henni friður og hún sé laus við þær þjáningar sem fylgja sjúkdómnum. Þau hafi náð að fara yfir þau mál sem skiptu þau máli og hann sé þakklátur fyrir það.

„Stefnan er 100% skýr og mun minning hennar verða heiðruð í orðum og verkum um ókomna tíð. Fanney lifir áfram í gimsteinunum okkar.“

Ragnar þakkar fyrir sýndan stuðning og hlýhug og minnist Fanneyjar með þakklæti. Þau hafi átt óteljandi hamingjustundir saman og hún hafi verið blessun í hans lífi.