Mikið elskaður risastór páfagaukur týndur í miðbæ Reykjavíkur

Páfagaukurinn Mímí er einhvers staðar á sveimi í miðbæ Reykjavíkur. Eigandi gauksins saknar hans mjög og eru miklar vonir bundnar við að hann finnist og skili sér heim. Þetta segir tónlistarmaðurinn og leikarinn Valdimar Örn Flygenring í samtali við Vísi.

Valdimar hringdi fyrir hönd vinar síns sem er eigandi gauksins. Fuglinn er algrænn og risastór, á mælikvarða páfagauka.

„Það átti að fara með hann til læknis í skoðun. Hann komst út úr risastóru búrinu sínu, slapp út og hann hvarf,“ segir Valdimar. Sólin skíni og eðlilega spennandi hjá gauknum að kíkja á umhverfi sitt. Það geti hins vegar reynst hættulegt.

„Hann gæti hafa flogið niður á tjörn, inn í skóg eða annað eins og þeir gera þessir gaurar. Hann er mikið elskaður þessi gaukur en hann hefur greinilega viljað kíkja á stelpurnar. En það er bara engin stelpa fyrir hann.“

Verði einhver páfagauksins var biður Valdimar viðkomandi um að slá á þráðinn í síma 899-1959.