Með lífsskoðunarfélag á lögmannsstofu sinni

Lífsskoðunarfélagið Vitund var skráð í febrúar og hefur aðeins þrjá meðlimi. Þrír lögmenn komu að skráningunni en þá greinir á um hver sinnir athöfnum, svo sem giftingum fyrir hönd félagsins.

Lögmaðurinn og fyrrverandi sóknarprestur á Staðastað, Páll Ágúst Ólafsson, er forstöðumaður og stjórnarformaður lífsskoðunarfélagsins Vitundar sem skráð var hjá sýslumanni í febrúar. Aðeins þrír meðlimir eru skráðir í félagið en í stjórn félagsins sitja, ásamt Páli, móðir hans Dögg Pálsdóttir og Helga Baldvins Bjargardóttir. Öll eru þau lögmenn á lögmannsstofunni ÍsMál, þar sem heimilisfang Vitundar er einnig skráð.

Þar er einnig skráð félagið Love Iceland sem sér um brúðkaupsþjónustu og er í eigu Karenar Lindar Ólafsdóttur, prests í Hjallakirkju og eiginkonu Páls Ágústs. Love Iceland er rétthafi að léninu vitund.is. Á þeirri síðu eru aðeins þrír pistlar, allir birtir í febrúar en á samfélagsmiðlum hafa verið reglulegar stöðuuppfærslur, sú fyrsta árið 2016. Á síðunni kemur fram að félagið sinnir athöfnum, svo sem giftingum.

Páll Ágúst hefur verið mikið í fjölmiðlum undanfarna mánuði. Í embættistíð sinni á Staðastað flutti hann fjölskyldu sína af prestsetrinu þar sem hann taldi það óíbúðarhæft. Var embættið síðar lagt niður og átti Páll Ágúst í miklum málaferlum við biskup Íslands og þjóðkirkjuna sem hann vann.

Fyrr í mánuðinum greindi Fréttablaðið frá því að Páll Ágúst hefði milligöngu um samskipti bandarískra kaupenda og þrotabús WOW air. Síðar hefur komið í ljós að athafnakonan Michele Ballarin fer fyrir kaupendahópnum.

„Ég tók að mér sem lögmaður að hjálpa hópi fólks að koma þessu á laggirnar. Mitt hlutverk er einvörðungu lögfræðilegt,“ segir Páll Ágúst um Vitund og benti á að Helga gæti uppfrætt um félagið. Sagði hann jafnframt að þetta tengdist deilum hans við biskup ekki á nokkurn hátt.

„Þetta er félagsskapur fólks sem hefur áhuga á að iðka mannréttindi,“ segir Helga. Vitund væri hópur fólks sem væri meðvitað um eigin forréttindi og jaðarstöðu annarra.

Helga segir að félagið hafi séð um athafnir og að Páll Ágúst hafi mest megnis séð um þær hingað til. Páll segist hins vegar ekki sjá um athafnirnar.

Samkvæmt reglugerð dómsmálaráðherra er lágmarksfjöldi trú- og lífsskoðunarfélaga 25. Helga segir að þau þrjú á lögmannsstofunni séu öll í félaginu en að fjöldinn sé meiri, nokkrir tugir.

„Ætli ég sé ekki mesta virknin eins og stendur,“ segir Helga um virkni félagsins. Samkvæmt lögum eru skilyrði skráningar trú- og lífsskoðunarfélags að félagið hafi náð fótfestu, starfsemi þess sé virk og stöðug. Hvorki dómsmálaráðuneytið né sýslumaðurinn á Siglufirði, sem sér um trúfélagsskráningar, gátu svarað fyrirspurnum Fréttablaðsins um skráninguna vegna sumarleyfa.