„Neytendasamtökin telja fullreynt að höfða til samvisku Gísla Kr. Björnssonar“

Neytendasamtökin hafa fengið sig fullsödd af lögmanninum Gísla Kr. Björnssyni sökum fullyrðinga hans um framgöngu Almennrar innheimtu ehf., sem samtökin segja að standist ekki skoðun.

Ondrej Šmakal, forstjóri Kredia Group, og fyrrnefndur Gísli, eigandi innheimtufyrirtækisins Almenn innheimta, sögðu í fjölmiðlum í vikunni að hætt sé að veita smálán og innheimta smálán á hærri vöxtum en 53,75 prósent, sem er það hæsta sem leyfilegt er samkvæmt lögum. Að sama skapi sagði Gísli að félag sitt hefði „útvegað allar sundurliðanir sem við höfum getað og verið beðin um.“

Neytendasamtökin segja hins vegar í yfirlýsingu til fjölmiðla í dag að þessar fullyrðingar Gísla standist ekki skoðun. Almenn innheimta hafi ekki látið af framferði sínu, viðskiptavinum sé enn neitað um sundurliðun og fyrirtækið haldi áfram innheimtu ólöglegra lána. Þetta telja Neytendasamtökin vera „stóralvarlegt.“

„Neytendasamtökin standa ráðþrota gagnvart þessu framferði og muna ekki eftir jafn svínslegum viðskiptaháttum og aðför að hópi neytanda sem oft er veikur fyrir. Þá er með öllu óskiljanlegt að lögmaður skuli komast upp með innheimtu á ólöglegum lánum og að halda mikilvægum gögnum frá lántakendum,“ segir í yfirlýsingu á vef samtakanna.

Þau taka aukinheldur dæmi af lántakanda sem þau segja að hafi þurft að greiða 750 þúsund krónum meira en honum bar - og 400 þúsund krónur til viðbótar. Þegar hann gerði kröfu á Almenna innheimtu um endurgreiðslu hætti fyrirtækið frekari innheimtu og felldi niður kröfu sínu.

„Neytendasamtökin telja fullreynt að höfða til samvisku Gísla Kr. Björnssonar lögmanns og eiganda Almennrar innheimtu ehf. Mikilvægt er að Lögmannafélag Íslands rannsaki hið fyrsta hvort háttsemi lögmannsins kunni að stríða gegn lögum eða siðareglum LMFÍ. Þar sem félagið tekur ekki við kvörtunum Neytendasamtakanna eru lántakendur sem standa í stappi við Almenna innheimtu ehf. hvattir til að senda kvörtun á Lögmannafélag Íslands.“

Nánar má fræðast um afstöðu Neytendasamtakanna á vef þeirra. Gísli Kr. Björnsson hafði ekki kynnt sér afstöðuna þegar Vísir leitaði viðbragða hjá honum í dag, en fréttin verður uppfærð þegar hann hefur sett sig inn í málið.