Hafnaboltamenn varaðir við stinningarlyfjum

Svo virðist vera sem hafnaboltamenn í Bandaríkjunum séu að kaupa ólögleg stinningarlyf á keppnisferðum. Það getur verið dýrt spaug.

Að minnsta kosti tveir leikmenn í MLB-hafnaboltadeildinni hafa fallið á lyfjaprófi og greindu frá því að ástæðan væri ólögleg stinningarlyf.

Forráðamenn deildarinnar ákváðu í kjölfarið að senda liðunum, og leikmönnum, tölvupóst þar sem leikmenn voru varaðir við því að kaupa stinningarlyf á bensínstöðvum og öðrum ólöglegum stöðum.

Ef þeir þyrftu á stinningarlyfi að halda ættu þeir að fá lækna félagsins til þess að skrifa upp á lögleg lyf á borð við Viagra og Cialis sem innihéldu engin efni sem gætu fellt þá á lyfjaprófi.

Ef leikmenn falla á lyfjaprófi í deildinni geta þeir verið að fá frá 80 til 120 leikja bann.