Kolbeinn spilaði í sigri Dortmund

Kolbeinn Birgir Finnsson og félagar í varaliði Borussia Dortmund unnu sigur á Fortuna Düsseldorf í þýsku Regionalliga West deildinni í dag.

Chris Fuhrich og Steffen Tigges skiptu mörkum Dortmund bróðurlega á milli sín en þeir skoruðu báðir tvö í 4-2 sigrinum.

Þetta var annar sigur Dortmund á tímabilinu í fimm leikjum og er liðið með sjö stig, lítk og Düsseldorf sem hefur þó leikið sex leiki.

Kolbeinn Birgir var að taka þátt í sínum öðrum leik fyrir Dortmund en hann gekk til liðs við þýska liðið á dögunum frá enska B-deildarfélaginu Brentford. Hann hafði leikið með Fylki í Pepsi Max deildinni í sumar á láni frá Brentford.