Fjölga póstboxum úr 8 í 43

Pósturinn hyggst bæta við um 35 póstboxum víðsvegar um landið næsta vor. Póstboxum fjölgar þannig úr 8 í 43. Meirihluti hluti nýju boxanna verður settur upp á höfuðborgarsvæðinu en þau verða einnig sett upp á völdum stöðum á landsbyggðinni. Þetta kemur fram í tilkynningu frá Íslandspósti.

Í tilkynningu segir að nánari staðsetningar á Póstboxunum liggi ekki fyrir en verið sé að greina „hentugar staðsetningar út frá magni og eftirspurn.“

Póstboxin eru nú átta talsins og eru staðsett víðsvegar á höfuðborgarsvæðinu.

„Helstu kostir Póstboxa eru að þau eru aðgengileg utan hefðbundins opnunartíma og það tekur aðeins örfáar sekúndur að sækja pakka í þau. Þá eru öll samskipti fyrir þá sem kjósa að nota Póstbox rafræn. Þegar er komin góð reynsla á þessa þjónustu og ánægðustu viðskiptavinir Póstsins eru þeir sem nýta sér hana samkvæmt könnunum,“ segir í tilkynningu Íslandspósts.