Baldur Sigurðs­son í FH | Sjáðu við­tal við hann á fyrstu æfingunni

Baldur Sigurðsson er genginn í raðir FH en Fimleikafélagið staðfesti þetta á miðlum sínum í kvöld.

Baldur kemur til FH frá Stjörnunni en hann samdi ekki áfram við félagið eftir tímabilið í sumar eftir að hafa leikið í Garðabæ frá árinu 2016.

Þar áður hafði hann leikið í atvinnumennsku sem og með KR og Keflavík en hann er uppalinn á Húsavík þar sem hann hóf sinn meistaraflokksferil með Völsungi.

Baldur hefur leikið 417 leiki í meistaraflokki og skorað í þeim 100 mörk en hann semur til FH til eins árs.

Guðjón Guðmundsson hitti á Baldur í dag er hann var á sinni fyrstu æfingu með FH í nýju knattspyrnuhúsi þeirra, Skessunni.

Viðtalið í heild sinni má sjá hér að neðan.



„Mér líst feikilega vel á þetta. Það er ekki leiðinlegt að koma á fyrstu æfinguna í þessari höll. Það er góð tilfinning að vera kominn í lið eins og FH,“ sagði Baldur.

Tók þetta langan tíma að skrifa undir hjá FH?

„Þetta var kannski tvær eða þrjár vikur. Eftir að þetta kom upp með Stjörnuna þurfti maður að hugsa kostina vel. Maður vissi ekki hvað myndi bjóðast. Áhuginn var góður og ég er ánægður með það.“

„Ég er ánægður með að maður sé eftirsóknarverður í samráði við fjölskyldu og hvað sé best fyrir mann. Ég er virkilega ánægður með þessa lendingu.“

Hvaða hlutverki er Baldri ætlað í Fimleikafélaginu?

„Það á eftir að koma í ljós. Ég held að ég sé að koma inn sem þessi leikmaður sem ég er; ákveðinn leiðtogi og með mikinn metnað. Mér finnst ég hafa mikið fram að færa og ég trúi því að við getum gert góða hluti næsta sumar.“

„Hérna er besta aðstaða landsins. Punktur. Ég er virkilega spenntur að nýta hana. Þessi höll sýnir að þetta er algjörlega frábært,“ sagði Baldur að lokum.