Í fyrsta sinn sem Noregur vinnur ekki til verðlauna eftir að hafa komist í undanúrslit undir stjórn Þóris

Norska kvennalandsliðið í handbolta, sem Þórir Hergeirsson stýrir, tapaði fyrir Rússlandi, 28-33, í leiknum um bronsið á HM í Japan.

Þetta er í fyrsta sinn sem Noregur vinnur ekki til verðlauna eftir að hafa komist í undanúrslit á stórmóti undir stjórn Þóris.

Hann hefur stýrt Noregi á 13 stórmótum og á þeim hefur liðið unnið til tíu verðlauna; sex gull, tvö silfur og tvö brons.

Norska liðið byrjaði betur í bronsleiknum í dag en um miðjan fyrri hálfleik náði það rússneska yfirhöndinni. Rússar breyttu stöðunni úr 9-8 í 9-13 og náðu góðu forskoti sem þær létu ekki af hendi. Staðan í hálfleik var 15-18, Rússlandi í vil.

Í seinni hálfleik náði Noregur aldrei að minnka muninn í minna en tvö mörk og Rússland vann nokkuð öruggan sigur, 28-33.

Stine Oftedal og Emilie Arntzen skoruðu sjö mörk hvor fyrir norska liðið.

Holland og Spánn mætast í úrslitaleik HM klukkan 11:30. Hvorugt liðið hefur áður orðið heimsmeistari.

HM:

2009 - brons

2011 - gull

2013 - 5. sæti

2015 - gull

2017 - silfur

2019 - 4. sæti

EM:

2010 - gull

2012 - silfur

2014 - gull

2016 - gull

2018 - 5. sæti

ÓL:

2012 - gull

2016 - brons